Azərbaycan beynəlxalq münasibətlər sistemində özünəməxsus mövqeyi, müstəqil xarici siyasəti və regional əməkdaşlığın inkişafına verdiyi töhfələrlə seçilən dövlətlərdən biridir. Coğrafi baxımdan Avropa ilə Asiyanın kəsişməsində yerləşən ölkəmiz Şərqlə Qərb arasında mühüm körpü rolunu oynayır. Azərbaycanın beynəlxalq nüfuzunun artması, siyasi və iqtisadi əlaqələrinin genişlənməsi dövlətimizin uğurlu inkişaf strategiyasının nəticəsidir.
2026-cı il oktyabrın 15-də Bakıda keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) 7-ci Zirvə Görüşündə cənab prezident İlham Əliyev çıxış edərək Azərbaycanın beynəlxalq münasibətlərdəki mövqeyini, üzləşdiyi çətinlikləri və qazandığı tarixi nailiyyətləri diqqətə çatdırmışdır. Dövlət başçısı ölkəmizin müstəqil xarici siyasət yürütdüyünü, dövlətlərin suverenliyinə və ərazi bütövlüyünə hörmət prinsipini əsas tutduğunu vurğulamışdır.
Çıxışda Azərbaycanın uzun illər ərzində üzləşdiyi işğal problemi, beynəlxalq təşkilatların qəbul etdiyi qətnamələrin icrasının təmin olunmaması və münaqişənin həllində tətbiq edilən ikili standartlar barədə fikirlər səsləndirilmişdir. Azərbaycan xalqı onilliklər ərzində ağır sınaqlarla üzləşsə də, öz doğma torpaqlarına qayıtmaq və ərazi bütövlüyünü bərpa etmək əzmindən dönməmişdir.
2020-ci ildə baş vermiş Vətən müharibəsi Azərbaycanın tarixində yeni mərhələnin başlanğıcı olmuşdur. Qırx dörd gün davam edən müharibə nəticəsində torpaqlarımızın böyük hissəsi işğaldan azad edilmişdir. 2023-cü ilin sentyabrında həyata keçirilən tədbirlər nəticəsində isə Azərbaycanın suverenliyi və ərazi bütövlüyü tam bərpa olunmuş, ölkəmizdə separatizmə son qoyulmuşdur. Bu tarixi hadisələr Azərbaycan dövlətinin gücünü, xalqımızın birliyini və milli iradəsini nümayiş etdirmişdir.
Ulu öndər Heydər Əliyevin müəyyən etdiyi dövlətçilik ənənələri, milli maraqların qorunması və müstəqil siyasət prinsipləri müasir Azərbaycanın inkişafında mühüm əhəmiyyət daşıyır. Bu siyasi irsin davam etdirilməsi ölkəmizin beynəlxalq arenada mövqeyinin möhkəmlənməsinə və milli maraqlarının qorunmasına xidmət edir.
Cənab prezident İlham Əliyev çıxışında sülhün qorunmasının və möhkəmləndirilməsinin vacibliyinə də xüsusi diqqət yetirmişdir. Azərbaycanın müharibədən sonra sülh təklif etməsi xalqımızın humanist dəyərlərə, ədalətə və gələcəyə yönəlmiş siyasətə sadiqliyini göstərir. Davamlı sülhün təmin edilməsi üçün dövlətlər arasında qarşılıqlı etimadın gücləndirilməsi, beynəlxalq hüquq normalarına əməl olunması və qəbul edilmiş qərarların icrası mühüm şərtlərdir.
Azərbaycanın AQEM-ə iki il ərzində sədrlik etməsi də təşkilatın inkişafına əhəmiyyətli töhfə vermişdir. Nəqliyyat, rəqəmsallaşma, ətraf mühitin mühafizəsi, turizm, təhsil və elm sahələrində əməkdaşlığın təşviqi ölkəmizin beynəlxalq tərəfdaşlığa verdiyi önəmi göstərir. Üzv dövlətlərin qarşılıqlı anlaşma və əməkdaşlıq şəraitində fəaliyyət göstərməsi regionda təhlükəsizliyin və iqtisadi rifahın möhkəmləndirilməsinə imkan yaradır.
Nəticə etibarilə, AQEM-in 7-ci Zirvə Görüşü Azərbaycanın beynəlxalq əməkdaşlığa, sülhə və təhlükəsizliyə verdiyi töhfələri nümayiş etdirən mühüm hadisə olmuşdur. Ölkəmiz bundan sonra da milli maraqlarını qorumaqla yanaşı, dövlətlər arasında qarşılıqlı etimadın və əməkdaşlığın inkişafına öz töhfəsini verməyə davam edəcəkdir.
Müşfiq Orucov adına 213 saylı məktəb-liseyin Azərbaycan dili və ədəbiyyat müəllimi Abbasova Məsumə