Fakt Sübut » Azərbaycan–Özbəkistan qardaşlığı: möhkəm təməldən strateji müttəfiqliyə

  

Azərbaycan–Özbəkistan qardaşlığı: möhkəm təməldən strateji müttəfiqliyə

Tarix : Bu gün, 11:41 Kateqoriya :---
Azərbaycan–Özbəkistan qardaşlığı: möhkəm təməldən strateji müttəfiqliyə
 
Azərbaycan və Özbəkistan arasında münasibətlər son illərdə yeni inkişaf mərhələsinə qədəm qoyaraq strateji tərəfdaşlıqdan müttəfiqlik səviyyəsinə yüksəlib. Bu əlaqələrin təməlində ortaq tarix, dil, mədəniyyət, mənəvi dəyərlər, qarşılıqlı hörmət və xalqlarımız arasında əsrlər boyu formalaşmış qardaşlıq bağları dayanır.
Prezident İlham Əliyevin Özbəkistanın Milli İnformasiya Agentliyinə verdiyi müsahibədə iki qardaş ölkə arasında münasibətlərin bütün istiqamətləri əhatəli şəkildə dəyərləndirilib. Dövlət başçısı Azərbaycan–Özbəkistan əlaqələrinin dinamik inkişafını qarşılıqlı səfərlər, siyasi dialoq, iqtisadi əməkdaşlıq, humanitar münasibətlər və Türk dünyasında həmrəylik kontekstində diqqətə çatdırıb.
Prezident İlham Əliyevin qeyd etdiyi kimi, son illərdə Azərbaycan və Özbəkistan arasında ən yüksək səviyyədə müntəzəm təmaslar münasibətlərin möhkəmlənməsi üçün əlverişli zəmin yaradıb. Dövlət başçılarının qarşılıqlı səfərləri və imzalanmış mühüm sənədlər iki ölkə arasındakı əlaqələrin hüquqi və siyasi əsaslarını daha da gücləndirib. 2024-cü ildə Azərbaycan Prezidentinin Özbəkistana dövlət səfəri, 2025-ci ildə isə Özbəkistan Prezidentinin Azərbaycana dövlət səfəri ikitərəfli münasibətlərin inkişafında mühüm mərhələ olub. Bu səfərlər zamanı imzalanan “Strateji tərəfdaşlığın dərinləşdirilməsi haqqında Bəyannamə” və “Müttəfiqlik münasibətləri haqqında Müqavilə” münasibətlərə yeni məzmun qazandırıb.
2023-cü ildə yaradılmış Ali Dövlətlərarası Şura Azərbaycan–Özbəkistan strateji tərəfdaşlığının və müttəfiqlik münasibətlərinin dərinləşdirilməsi baxımından mühüm institusional mexanizmə çevrilib. Şuranın Bakı və Daşkənddə keçirilən iclasları ölkələr arasında siyasi dialoqun ardıcıllığını və uzunmüddətli əməkdaşlığa verilən önəmi nümayiş etdirir.
Bu gün siyasi münasibətlər iqtisadiyyat, investisiya, sənaye, nəqliyyat, logistika, enerji, kənd təsərrüfatı, təhsil, elm, mədəniyyət və humanitar sahələrdə geniş əməkdaşlıqla tamamlanır. Belə çoxşaxəli əməkdaşlıq həm dövlətlərarası əlaqələri möhkəmləndirir, həm də xalqlarımız arasındakı dostluq və qardaşlıq münasibətlərini daha da dərinləşdirir.
Azərbaycan–Özbəkistan münasibətlərinin mühüm istiqamətlərindən biri iqtisadi-ticari əlaqələrdir. Son illərdə iki ölkə arasında ticarət dövriyyəsinin əhəmiyyətli dərəcədə artması əməkdaşlığın real nəticələrini göstərir. 2025-ci ildə ticarət dövriyyəsi əvvəlki illə müqayisədə üç dəfədən çox artaraq 795 milyon ABŞ dollarına çatıb. 2026-cı ilin yanvar-may aylarında isə ticarət dövriyyəsində daha 33 faiz artım qeydə alınıb.
İnvestisiya əməkdaşlığı da münasibətlərin mühüm dayaqlarından biridir. 500 milyon ABŞ dolları ümumi kapitalla yaradılmış Azərbaycan–Özbəkistan İnvestisiya Şirkəti hər iki ölkədə müxtəlif iqtisadi sahələr üzrə perspektivli layihələrin maliyyələşdirilməsinə və həyata keçirilməsinə töhfə verir.
Nəqliyyat və logistika sahəsində əməkdaşlıq da xüsusi əhəmiyyət daşıyır. Azərbaycan və Özbəkistanın coğrafi mövqeyi onları Şərqlə Qərbi birləşdirən mühüm nəqliyyat marşrutlarında təbii tərəfdaşlara çevirir. Bu baxımdan Orta Dəhlizin inkişafı, eləcə də yeni regional nəqliyyat layihələrinin inteqrasiyası gələcəkdə geniş iqtisadi imkanlar vəd edir.
Energetika sahəsində də Azərbaycan–Özbəkistan əməkdaşlığı genişlənir. Neft-qaz sektorunda birgə müəssisələrin fəaliyyəti ilə yanaşı, yaşıl enerji istiqamətində də mühüm addımlar atılır.
Azərbaycan, Qazaxıstan və Özbəkistanın müvafiq qurumları tərəfindən yaradılmış “Yaşıl Dəhliz Birliyi” yaşıl enerji dəhlizinin inkişafına, bərpaolunan enerjinin ixracına və onun Xəzər dənizinin dibi ilə nəqli imkanlarının əlaqələndirilməsinə xidmət edir.
İşğaldan azad edilmiş Füzuli rayonunda Özbəkistanla birgə həyata keçirilən layihələr isə iqtisadi əməkdaşlığın xüsusi nümunələrindəndir. Burada 100 hektarlıq “Dostluq bağı”nın salınması, eləcə də avtomobil istehsalı sahəsində əməkdaşlıq iki ölkənin iqtisadi potensialının birləşdirilməsinin real göstəriciləridir.
Azərbaycan və Özbəkistan münasibətlərinin gücü yalnız siyasi və iqtisadi əlaqələrlə məhdudlaşmır. Xalqlarımızı birləşdirən ortaq tarix, mədəniyyət və mənəvi dəyərlər humanitar əməkdaşlığın əsasını təşkil edir.
Mədəniyyət günləri, incəsənət festivalları, elmi konfranslar, ədəbi nəşrlər və müxtəlif təhsil proqramları iki ölkənin xalqlarını daha da yaxınlaşdırır. Azərbaycan və Özbəkistan Mədəniyyəti Günlərinin qarşılıqlı keçirilməsi, Xivədə “Şuşa Günləri”nin təşkil olunması və digər layihələr bu dostluğun mədəni müstəvidə də davamlı xarakter daşıdığını göstərir.
Bakının mərkəzində yaradılan “Özbəkistan” parkı da iki xalqın qardaşlığının rəmzlərindən birinə çevriləcək. Bu cür layihələr xalqlarımızın ortaq mənəvi irsinin gələcək nəsillərə çatdırılması baxımından xüsusi əhəmiyyət daşıyır.
Təhsil sahəsi Azərbaycan–Özbəkistan humanitar tərəfdaşlığının aparıcı istiqamətlərindən biridir. 2025–2026-cı tədris ilində Özbəkistanın 67 vətəndaşı Azərbaycanda, Azərbaycanın isə 176 vətəndaşı Özbəkistanda təhsil alıb.
Füzuli şəhərində Özbəkistanın təşəbbüsü ilə inşa edilmiş Mirzə Uluqbəy adına orta məktəb isə iki ölkə arasındakı qardaşlığın ən parlaq nümunələrindən biridir. Bu məktəb təkcə təhsil ocağı deyil, həm də Azərbaycan və Özbəkistan xalqları arasında dostluğun, həmrəyliyin və qarşılıqlı dəstəyin canlı ifadəsidir.
Azərbaycan və Özbəkistanın əməkdaşlığı Türk Dövlətləri Təşkilatı çərçivəsində də xüsusi əhəmiyyət daşıyır. Hər iki ölkə TDT-ni yalnız dövlətlərarası əməkdaşlıq platforması deyil, həm də ortaq tariximizi, mədəniyyətimizi və mənəvi dəyərlərimizi gələcəyə daşıyan mühüm birlik kimi qiymətləndirir.
Özbəkistanın Türk Mədəniyyəti və İrsi Fonduna tamhüquqlu üzv qəbul edilməsi də Türk dünyasının ortaq irsinin qorunması və təbliği baxımından mühüm addımdır.
Azərbaycanın Mərkəzi Asiya Dövlət Başçılarının Məşvərət görüşlərində tamhüquqlu iştirakı isə regionlararası əməkdaşlığın yeni mərhələyə keçdiyini göstərir. Bununla əvvəllər “C5” formatı kimi tanınan əməkdaşlıq formatı faktiki olaraq “C6” formatına çevrilib və Azərbaycanın Mərkəzi Asiya ilə əlaqələrə verdiyi strateji əhəmiyyət daha aydın şəkildə ortaya çıxıb.
Azərbaycan–Özbəkistan münasibətləri bu gün qarşılıqlı hörmət, etimad, strateji maraqlar və ortaq dəyərlər üzərində inkişaf edir. Siyasi dialoqun yüksək səviyyəsi, artan ticarət dövriyyəsi, birgə investisiya və sənaye layihələri, humanitar əlaqələrin genişlənməsi və Türk dünyasının birliyinə verilən töhfələr bu münasibətlərin çoxşaxəli xarakterini nümayiş etdirir.
Prezident İlham Əliyevin müsahibəsində səsləndirdiyi fikirlər bir daha göstərir ki, Azərbaycan və Özbəkistan arasında münasibətlər yalnız bu günün əməkdaşlığı ilə məhdudlaşmır. Bu münasibətlər gələcək nəsillər üçün möhkəm dostluq, qardaşlıq və strateji tərəfdaşlıq irsi formalaşdırır.
Azərbaycan və Özbəkistanın birgə səyləri ilə qurulan bu möhkəm körpü yalnız iki dövlətin deyil, bütövlükdə Türk dünyasının və regionun inkişafına, sabitliyinə və rifahına xidmət edən mühüm amilə çevrilir. Qarşılıqlı etimad və ortaq maraqlar üzərində qurulan Azərbaycan–Özbəkistan müttəfiqliyi gələcəkdə də yeni layihələr, yeni təşəbbüslər və yeni uğurlarla zənginləşəcək.
Bakıxanov qəsəbəsi 96 nömrəli tam orta ümumtəhsil məktəbinin direktoru
Mehriban Hacıyeva
Paylaş:

Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Daha çox xəbər :

все шаблоны для dle на сайте newtemplates.ru скачать

Təqvim

«    Avqust 2026    »
BeÇaÇCaCŞB
 12
3456789
10111213141516
17181920212223
24252627282930
31 

Təsisçi və baş redaktor: Eminov Mehman Niftalı oğlu
Tel: 050 577 95 98
Ünvan: Bakı şəhəri, Yasamal rayonu, Mətbuat prospekti, 529-cu məhəllə, Azərbaycan Nəşriyyatı