Yeni Azərbaycan Partiyasının VIII Qurultayı Azərbaycanın ictimai-siyasi həyatında mühüm hadisə olmaqla yanaşı, ölkəmizin tarixində yeni mərhələnin başlanğıcını əks etdirən mühüm siyasi hadisədir. Qurultayın əsas xüsusiyyətlərindən biri onun Azərbaycanın ərazi bütövlüyünü və suverenliyini tam bərpa etməsindən sonra keçirilməsidir.

Uzun illər ərzində Azərbaycan xalqının qarşısında duran ən mühüm məsələlərdən biri işğal altında olan torpaqlarımızın azad edilməsi və ölkəmizin ərazi bütövlüyünün bərpası idi. 2020-ci ildə 44 günlük Vətən müharibəsində əldə olunan şanlı Zəfər bu məqsədə gedən yolda tarixi dönüş yaratdı. Azərbaycan Ordusunun qəhrəmanlığı və xalqımızın möhkəm birliyi nəticəsində torpaqlarımızın böyük hissəsi işğaldan azad edildi. Şuşanın azad olunması isə qələbənin taleyini müəyyən edən mühüm hadisələrdən biri oldu.

Lakin Azərbaycanın qarşısında suverenliyin tam bərpası vəzifəsi də dayanırdı. 2023-cü il sentyabrın 19-20-də keçirilən lokal xarakterli antiterror tədbirləri nəticəsində ölkəmizin suverenliyi bütün ərazimizdə tam bərpa edildi. Bununla Azərbaycanın dövlət müstəqilliyi və ərazi bütövlüyü ilə bağlı qarşısında duran ən mühüm tarixi məsələlər öz həllini tapdı.

Məhz belə bir tarixi şəraitdə keçirilən YAP-ın VIII Qurultayı xüsusi əhəmiyyət daşıyır. Çünki bu qurultay artıq qalib və öz ərazi bütövlüyünü təmin etmiş Azərbaycanın yeni reallıqlarını nümayiş etdirir. Qarşıda isə daha böyük hədəflər – azad edilmiş ərazilərin bərpası, Böyük Qayıdışın uğurla həyata keçirilməsi, ölkənin iqtisadi və sosial inkişafının sürətləndirilməsi dayanır.

Qurultay həm də xalqımızın dövlətçilik ənənələrinə və milli birliyə sadiqliyinin göstəricisidir. Azərbaycanın əldə etdiyi tarixi Zəfər xalq-dövlət birliyinin, milli iradənin və məqsədyönlü siyasətin mühüm nəticəsi kimi qiymətləndirilə bilər. Bu birlik ölkəmizin gələcək inkişafının da əsas dayaqlarından biridir.

Bu baxımdan, YAP-ın VIII Qurultayını yalnız siyasi partiyanın növbəti qurultayı kimi deyil, Azərbaycanın ərazi bütövlüyünü və suverenliyini tam bərpa etmiş qalib dövlət kimi yeni siyasi mərhələyə qədəm qoymasının mühüm göstəricisi kimi dəyərləndirmək olar.

Sabunçu qəsəbəsi ,170 nömrəli tam orta ümumtəhsil məktəbin Azərbaycan dili və ədəbiyyat müəllimi Vəliyeva Lamiyə.