Beynəlxalq ticarətin inkişafı, istehsal və istehlak mərkəzləri arasında əlaqələrin genişlənməsi nəqliyyat dəhlizlərinin strateji əhəmiyyətini artırır. Qlobal təchizat zəncirlərinin etibarlılığı artıq yalnız daşımaların sürəti ilə deyil, marşrutların təhlükəsizliyi, infrastrukturun keyfiyyəti və sərhəd prosedurlarının səmərəliliyi ilə də müəyyən olunur. Belə şəraitdə əlverişli coğrafi mövqeyə malik olmaq mühüm üstünlükdür. Lakin bu üstünlüyün real iqtisadi dividendlərə çevrilməsi üçün müasir logistika sistemi və çevik idarəetmə mexanizmləri tələb olunur. Azərbaycan məhz bu amilləri birləşdirərək Avrasiya məkanında nəqliyyat qovşağı kimi mövqeyini gücləndirir.
        
Prezident İlham Əliyevin sentyabrın 26-da II Azərbaycan Beynəlxalq İnvestisiya Forumu çərçivəsində keçirilən tədbirdə səsləndirdiyi fikirlər ölkəmizin tranzit strategiyasının əhatə dairəsini aydın göstərir. Dövlət başçısı Şərq-Qərb və Şimal-Cənub istiqamətlərinin hər ikisində Azərbaycanın fəal iştirakını xüsusi vurğulayıb. Bu iki əsas nəqliyyat xəttinin ölkəmizdən keçməsi Azərbaycanı müxtəlif regionlar arasında yükdaşımaların həyata keçirilməsi baxımından əhəmiyyətli mövqeyə çıxarır. Azərbaycanın tranzit imkanlarının üstünlüyü onun yalnız coğrafi yerləşməsi ilə məhdudlaşmır. Xəzər dənizi vasitəsilə həyata keçirilən daşımalar ölkəmizin beynəlxalq nəqliyyat sistemindəki rolunu daha da genişləndirir. Dəniz limanları, bərə əlaqələri və quru nəqliyyatı arasında qarşılıqlı uyğunluq yüklərin bir marşrutdan digərinə ötürülməsində mühüm əhəmiyyət daşıyır. Bu sistemin səmərəli fəaliyyəti yük sahiblərinə alternativ daşınma imkanları təqdim edir, regional ticarət əlaqələrinin inkişafına və iqtisadi əməkdaşlığın dərinləşməsinə şərait yaradır.
        
Şərq-Qərb və Şimal-Cənub dəhlizlərinin kəsişməsində yerləşmək Azərbaycan üçün əlavə iqtisadi imkanlar formalaşdırır. Bu marşrutlar vasitəsilə daşınan yüklərin həcminin artması logistika xidmətlərinə, anbar təsərrüfatına, nəqliyyat vasitələrinin texniki təminatına və digər əlaqəli sahələrə tələbatı yüksəldə bilər. Beləliklə, tranzit fəaliyyəti yalnız ölkə ərazisindən yük keçirilməsi ilə yekunlaşmır, eyni zamanda, geniş xidmət sektorunun inkişafına təkan verir. Bu sahədə yaradılan əlavə dəyər iqtisadiyyatın şaxələndirilməsi baxımından da əhəmiyyətlidir.
       
 Prezident İlham Əliyevin Azərbaycanın hər iki dəhlizdə fəal iştirakını önə çəkməsi ölkəmizin regional bağlantıların inkişafına verdiyi töhfəni əks etdirir. Nəqliyyat marşrutlarının davamlı fəaliyyəti tərəfdaş ölkələr arasında qarşılıqlı asılılığı və iqtisadi əməkdaşlığı gücləndirir. Azərbaycan üçün isə bu proses tranzit gəlirlərinin artırılması, beynəlxalq bazarlara çıxışın genişləndirilməsi və ölkənin iqtisadi əlaqələrinin coğrafiyasının böyüməsi deməkdir. Nəqliyyat sektorunun inkişafı investisiya mühiti ilə də sıx bağlıdır. Logistika mərkəzlərinin, limanların, dəmir yollarının və digər infrastruktur obyektlərinin yaradılması böyük maliyyə vəsaitləri tələb edir. Eyni zamanda, bu sahədə uzunmüddətli nəticələr əldə etmək üçün dövlət qurumları, daşıyıcı şirkətlər və beynəlxalq tərəfdaşlar arasında əlaqələndirilmiş fəaliyyət vacibdir. Azərbaycanın tranzit potensialının genişlənməsi bu istiqamətlərdə yeni əməkdaşlıq imkanları yaradır. Bununla yanaşı, müasir nəqliyyat qovşağı olmaq dəyişən beynəlxalq tələblərə uyğunlaşmağı da zəruri edir. Yükdaşımaların səmərəliliyi marşrutların mövcudluğu ilə yanaşı, onların fasiləsiz işləməsindən və müxtəlif nəqliyyat növlərinin uzlaşdırılmasından asılıdır. Buna görə də Azərbaycanın tranzit siyasətində infrastrukturun inkişafı ilə xidmət keyfiyyətinin yüksəldilməsi paralel şəkildə əhəmiyyət daşıyır.
       
 Prezident İlham Əliyevin forumda diqqətə çatdırdığı məqamlar Azərbaycanın nəqliyyat strategiyasının iqtisadi və geosiyasi əhəmiyyətini ortaya qoyur. Şərq-Qərb və Şimal-Cənub istiqamətlərində mövcud imkanların genişləndirilməsi ölkəmizin regional bağlantılardakı rolunu möhkəmləndirməklə yanaşı, yeni investisiyalar üçün də zəmin yaradır. Azərbaycan beləliklə, coğrafi mövqeyini müasir infrastruktur və beynəlxalq əməkdaşlıq vasitəsilə iqtisadi üstünlüyə çevirmək istiqamətində fəaliyyətini davam etdirir.

Rüstəm Nağıyev,
YAP Gədəbəy rayon təşkilatının sədri.