Azərbaycanın qarşıdakı illərdə iqtisadi inkişafının əsas istiqamətləri, yeni investisiya imkanları və ölkənin regional əhəmiyyəti II Azərbaycan Beynəlxalq İnvestisiya Forumunda geniş müzakirə olunub. Prezident İlham Əliyevin çıxışında Azərbaycanın əldə etdiyi iqtisadi nəticələr, mövcud potensialı və gələcək inkişaf üçün qarşıya qoyulan prioritetlər diqqətə çatdırılıb. Son illərdə formalaşdırılan sabit iqtisadi və maliyyə sistemi Azərbaycanın gələcək inkişafı üçün mühüm baza yaradıb. Son 20 ildə ölkəyə 350 milyard ABŞ dollarından çox investisiyanın cəlb edilməsi, bunun təxminən yarısının xarici investisiyaların payına düşməsi Azərbaycanın investorlar üçün əhəmiyyətini göstərən əsas göstəricilərdən biri kimi təqdim edilib.

İqtisadiyyatın şaxələndirilməsi çıxışın əsas mövzularından olub. Uzunmüddətli və dayanıqlı artım üçün neft-qaz sektorundan kənar sahələrin inkişafının vacibliyi vurğulanıb. Bu baxımdan bərpaolunan enerji, logistika, nəqliyyat, mədənçilik, kənd təsərrüfatı, rəqəmsal texnologiyalar və süni intellekt əsas perspektivli istiqamətlər kimi qeyd edilib.

Bərpaolunan enerji sahəsində Azərbaycanın böyük imkanlara malik olduğu bildirilib. Xəzər dənizinin Azərbaycan sektorunda 157 giqavatlıq enerji potensialının olduğu, günəş və külək elektrik stansiyalarının inkişaf etdirildiyi qeyd olunub. Yeni enerji ötürücü xətlərin və enerji saxlanc sistemlərinin yaradılması ilə Azərbaycanın elektrik enerjisi ixrac edən ölkələrdən birinə çevrilməsi hədəflənir.

Nəqliyyat və logistika da ölkənin iqtisadi inkişafında mühüm yer tutur. Azərbaycan həm Şərq-Qərb, həm də Şimal-Cənub dəhlizlərinin üzərində yerləşməklə mühüm tranzit imkanlarına malikdir. Dəmir yollarına, avtomobil yollarına, limanlara və hava nəqliyyatına yatırılan investisiyalar bu imkanların daha da genişləndirilməsinə xidmət edir. Tranzit daşımaların həcminin 2030-cu ilədək 25 milyon tona çatdırılması nəzərdə tutulur.

Çıxışda neft-qaz sektorunun da yaxın illərdə Azərbaycan iqtisadiyyatında mühüm rolunu qoruyacağı bildirilib. “Exxon” və “Total” şirkətləri ilə yeni layihələr, neft-qaz hasilatının artırılması və əldə olunan gəlirlərin iqtisadiyyatın digər sahələrinə yönəldilməsi bu siyasətin əsas istiqamətlərindən biri kimi göstərilib.

Digər mühüm istiqamət rəqəmsal transformasiya və insan kapitalının inkişafıdır. Süni intellekt, data mərkəzləri, kibertəhlükəsizlik və müasir texnologiyalarla yanaşı, bu sahələr üçün peşəkar kadrların hazırlanmasının vacibliyi vurğulanıb. Xaricdə təhsil proqramları və yeni təhsil təşəbbüsləri də insan kapitalının gücləndirilməsi baxımından əhəmiyyətli addımlar kimi təqdim olunub.

Beləliklə, çıxışda Azərbaycanın gələcək iqtisadi inkişaf modeli daha çox şaxələndirmə, enerji, logistika, rəqəmsallaşma və insan kapitalı üzərində qurulur. Əsas məqsəd mövcud imkanlardan səmərəli istifadə etməklə qeyri-neft sektorunu və ölkənin beynəlxalq iqtisadi mövqeyini daha da gücləndirməkdir.

Sabunçu qəsəbəsi, 155 nömrəli tam orta məktəbin Tarix müəllimi Pərvin İbrahimova