Azərbaycan və Özbəkistan arasında münasibətlər qədim tarixi, mədəni və mənəvi bağlara əsaslanır. Bu yaxınlıq son illərdə siyasi münasibətlərlə yanaşı, iqtisadi əməkdaşlığın da sürətlə inkişaf etməsinə şərait yaradıb. İki qardaş ölkə qarşılıqlı maraqlar əsasında ticarət, investisiya, sənaye, energetika, nəqliyyat, kənd təsərrüfatı və digər sahələrdə əlaqələrini davamlı şəkildə genişləndirir.
Azərbaycan–Özbəkistan münasibətlərinin inkişafında dövlət başçılarının qarşılıqlı səfərləri və siyasi dialoqu xüsusi əhəmiyyət daşıyır. Bu baxımdan Azərbaycan Respublikasının Prezidenti İlham Əliyevin 23 avqust 2026-cı ildə Özbəkistana dövlət səfəri iki ölkə arasında əlaqələrin inkişafında mühüm hadisə kimi diqqət çəkir. Səfər çərçivəsində Prezident İlham Əliyevin Özbəkistan Prezidenti Şavkat Mirziyoyevlə təkbətək görüşü keçirilib, həmçinin Azərbaycan və Özbəkistan Ali Dövlətlərarası Şurasının 3-cü iclası baş tutub.
Səfər zamanı iki ölkə arasında müxtəlif sahələri əhatə edən sənədlərin imzalanması və mübadiləsi də əməkdaşlığın daha da möhkəmləndirilməsi baxımından mühüm əhəmiyyət daşıyır. Prezident İlham Əliyev və Prezident Şavkat Mirziyoyevin mətbuata bəyanatlarında Azərbaycan–Özbəkistan münasibətlərinin strateji xarakteri və gələcək əməkdaşlıq imkanları xüsusi vurğulanıb.
İqtisadi əməkdaşlığın əsas istiqamətlərindən biri qarşılıqlı ticarətin inkişafıdır. Son illərdə iki ölkə arasında ticarət dövriyyəsinin artması iqtisadi əlaqələrin dinamik inkişaf etdiyini göstərir. Azərbaycan və Özbəkistanın biznes nümayəndələri arasında keçirilən görüşlər və regionlararası forumlar sahibkarlar üçün yeni imkanlar yaradır. Bu tədbirlər müxtəlif sahələrdə yeni müqavilələrin imzalanmasına və birgə layihələrin həyata keçirilməsinə şərait yaradır.
Prezident İlham Əliyevin Özbəkistana son dövlət səfəri zamanı bu əməkdaşlığın praktiki nəticələri də nümayiş etdirilib. Daşkənddə Azərbaycanın Özbəkistanda həyata keçirdiyi layihələrin açılış və təməlqoyma mərasimləri keçirilib. “Davr Bank”, “Matanat-A” şirkətinin gips zavodu və “Landau” adına STEAM məktəbləri kimi layihələrin açılışı olub. Bundan başqa, SOCAR-ın yeni yanacaqdoldurma məntəqələri, “Sea Breeze Uzbekistan”, “Baku City”, gümüş tərkibli filizin emalı fabriki və meyvə bağları kimi layihələrin təməli qoyulub. Bu layihələr Azərbaycanın Özbəkistan iqtisadiyyatına artan investisiya marağının göstəricisidir.
Sənaye sahəsində əməkdaşlıq Azərbaycan–Özbəkistan iqtisadi tərəfdaşlığının diqqətçəkən istiqamətlərindəndir. İki ölkə arasında avtomobil sənayesi, tekstil, kənd təsərrüfatı, qida sənayesi və tikinti kimi sahələrdə birgə layihələr həyata keçirilir. Belə layihələr istehsal imkanlarını artırmaqla yanaşı, texnologiya və təcrübə mübadiləsinə də imkan yaradır.
Nəqliyyat və logistika sahəsində əməkdaşlıq da xüsusi əhəmiyyət daşıyır. Azərbaycan Şərqlə Qərbi birləşdirən mühüm nəqliyyat qovşaqlarından biridir. Özbəkistanın Mərkəzi Asiyada yerləşməsi isə iki ölkənin nəqliyyat imkanlarının əlaqələndirilməsi üçün geniş perspektivlər yaradır. Orta Dəhlizin inkişafı Azərbaycan və Özbəkistan arasında ticarət əlaqələrinin genişlənməsinə və məhsulların yeni bazarlara çıxarılmasına imkan verə bilər.
İlham Əliyevin səfəri zamanı iqtisadi əməkdaşlıqla yanaşı, xalqlarımız arasındakı dostluq və qardaşlıq münasibətlərinin simvolik ifadəsi olan mühüm tədbirlər də keçirilib. Prezidentlər Yeni Daşkənd şəhərində “Azərbaycan” parkının təməlini qoyublar. Parkda Azərbaycanın tarixini, mədəniyyətini və ənənələrini əks etdirən ictimai məkan yaradılacaq. Bu park iki xalq arasındakı dostluğun və qarşılıqlı hörmətin növbəti rəmzi olacaq.
Həmçinin səfər çərçivəsində Prezident Şavkat Mirziyoyevin “Heydər Əliyev” ordeni ilə təltif edilməsi, Prezident İlham Əliyevin isə Özbəkistanın ali dərəcəli “Dostluq” ordeni ilə təltif olunması iki ölkə liderləri arasında yüksək etimadın və dostluq münasibətlərinin göstəricisi kimi qiymətləndirilə bilər.
Nəticə etibarilə, Azərbaycan–Özbəkistan iqtisadi əməkdaşlığı sürətlə inkişaf edən və çoxşaxəli xarakter daşıyan tərəfdaşlıq modelidir. Prezident İlham Əliyevin Özbəkistana 23 avqust 2026-cı il tarixli dövlət səfəri bu münasibətlərin yeni mərhələyə yüksəldiyini nümayiş etdirdi. Səfər zamanı keçirilən görüşlər, imzalanan sənədlər, yeni layihələrin açılışı və təməlqoyma mərasimləri iqtisadi əlaqələrin konkret nəticələrə əsaslandığını göstərir.
Azərbaycan və Özbəkistan arasında mövcud siyasi etimad, tarixi-mədəni yaxınlıq və qarşılıqlı iqtisadi maraqlar gələcəkdə əməkdaşlığın daha da genişlənməsi üçün möhkəm zəmin yaradır. Bu əməkdaşlıq yalnız iki ölkənin iqtisadi inkişafına deyil, həm də Mərkəzi Asiya ilə Cənubi Qafqaz arasında iqtisadi əlaqələrin güclənməsinə mühüm töhfə verir.
E.Ağayev adına 198 nömrəli tam orta məktəbin əməkdaşı
Mirzəbəyova Şəhla Əli qızı