Azərbaycan Respublikasının Prezidenti cənab İlham Əliyev Çinin Sinxua agentliyinə müsahibəsi zamanı bu fikirləri bildirmişdir.

Bildiyimiz kimi 21 aprel 2025-ci il tarixində Azərbaycan Respublikasının Prezidenti cənab İlham Əliyev Çinin Sinxua agentliyinə məxsusi müsahibə vermişdir. Müxtəlif məzmunlu sualları cavablandıran Möhtərəm Cənab Prezident ölkəmizin beynəlxalq sistemdə tutduğu mövqedən və yürütdüyü uğurlu xarici siyasətdən bəhs edərək vurğulamışdır ki, Azərbaycan dövləti olaraq bizim siyasətimiz hər zaman, sözün əsl mənasında, qarşılıqlı əməkdaşlığa əsaslanıb. Çünki biz inanırıq ki, yalnız əməkdaşlıq sayəsində uğur qazanmaq mümkündür. Azərbaycan-Çin münasibətlərinə toxunan cənab Prezident xüsusi vurğulamışdır ki, strateji tərəfdaş olan Azərbaycanla Çin arasında münasibətlər qarşılıqlı etimada və milli maraqlara əsaslanır. Hər iki dövlətin müxtəlif sahələri əhatə edən münasibətləri regionda sülh və qarşılıqlı əməkdaşlığın güclənməsinə xidmət edir. Çinin beynəlxalq sistemdə tutduğu mövqeyi yüksək qiymətləndirən dövlətimizin başçısı qeyd etdi ki, “ hazırda Çin dünyanın ən çox dinamik inkişaf edən ölkələrindən biridir və Çinin inkişafı təkcə Çin xalqının deyil, həm də dünyanın maraqlarına cavab verir.” Xüsusi qeyd etməliyik ki, Çin iqtisadiyyatı çox sabitdir və bu, qlobal iqtisadiyyatın mühüm bir amilidir.

Qədim tarixə və xeyirxah ənənələrə əsaslanan Azərbaycan-Çin münasibətləri yüksələn xətlə inkişaf edir və sevindirici haldır ki, strateji tərəfdaşlığımız yeni müsbət məzmunla zənginləşir. Məlumat üçün qeyd etməliyik ki, hazırda Çinin ölkəmizin ticarət dövriyyəsində yeri durmadan yüksəlməkdədir. Sürətli dinamika nəticəsində Çin Azərbaycanın əsas ticarət tərəfdaşlarından birinə çevrilib və ötən ilin nəticələrinə əsasən Çin Azərbaycanın 4-cü iri ticarət tərəfdaşına çevrilib. Çinin Azərbaycanın xarici ticarət dövriyyəsində payı 18 faizə çatıb.

Bildiyimiz kimi hazırda dünya yeni çağırışlarla üz-üzədir. Dünyanın mövcud geosiyasi vəziyyətinin mürəkkəbliyi fonunda qlobal siyasi sistemində mühüm mərhələnin əsası qoyulmuşdur. Möhtərəm cənab Prezident İlham Əliyevin rəhbərliyi ilə ölkəmiz Cənubi Qafqazın lider dövləti olaraq beynəlxalq aləmdə mövqeyini daha da möhkəmləndirməkdədir. Hazırda Azərbaycan beynəlxalq ictimaiyyət tərəfindən etibarlı tərəfdaş kimi qəbul edilir, qlobal güc mərkəzləri ilə siyasi və iqtisadi əlaqələrinin inkişafı, əməkdaşlığın daha da genişləndirilməsi baxımından böyük önəm daşıyır. Bu baxımdan ölkəmizin Çin Xalq Respublikası ilə münasibətlərini dərinləşdirməsi mühüm əhəmiyyət kəsb edir.