26 avqust Azərbaycan Respublikasının Birinci vitse-prezidenti, ölkəmizin birinci xanımı Mehriban Əliyevanın doğum günüdür. Bu əlamətdar gün təkcə bir yubiley tarixi deyil, eyni zamanda uzun illər Azərbaycan dövlətinə və xalqına xidmət edən, ictimai-siyasi, sosial, humanitar və mədəni sahələrdə çoxşaxəli fəaliyyəti ilə seçilən görkəmli dövlət xadiminin həyat yoluna nəzər salmaq üçün mühüm fürsətdir. Mehriban Əliyevanın fəaliyyəti dövlətçilik prinsiplərinə sədaqət, milli maraqlara bağlılıq, insanlara qayğı və xeyirxahlıq kimi yüksək mənəvi dəyərlərlə səciyyələnir.

Mehriban Əliyevanın keçdiyi həyat yolu yüksək təhsil, zəngin dünyagörüşü və xalqa xidmət amalının vəhdətini özündə əks etdirir. 1964-cü il avqustun 26-da Bakı şəhərində ziyalı ailəsində dünyaya gələn Mehriban Əliyeva ali tibb təhsili alıb və əmək fəaliyyətinin ilk illərində səhiyyə sahəsində çalışıb. Onun sonrakı ictimai və dövlətçilik fəaliyyəti isə təhsildən səhiyyəyə, mədəniyyətdən idmana, sosial layihələrdən beynəlxalq humanitar əməkdaşlığa qədər geniş istiqamətləri əhatə edib.

Mehriban Əliyevanın fəaliyyətində Azərbaycan dövlətçiliyinə, milli maraqlara və Ümummilli Lider Heydər Əliyevin siyasi irsinə sədaqət xüsusi yer tutur. Heydər Əliyev Fonduna rəhbərlik edən Mehriban Əliyeva Ulu Öndərin zəngin dövlətçilik irsinin öyrənilməsi, milli dövlətçilik ideyalarının yeni nəsillərə çatdırılması istiqamətində mühüm fəaliyyət göstərir. Fondun həyata keçirdiyi çoxsaylı layihələr Azərbaycanın mədəni və mənəvi sərvətlərinin qorunması ilə yanaşı, sosial-humanitar təşəbbüslərin genişlənməsinə də xidmət edir.

Onun fəaliyyətinin ən mühüm xüsusiyyətlərindən biri insan amilinə xüsusi həssaslıqla yanaşmasıdır. Uşaqların təhsili, səhiyyə imkanlarının yaxşılaşdırılması, qayğıya ehtiyacı olan insanların problemlərinin diqqətdə saxlanılması və müxtəlif xeyriyyə təşəbbüslərinin həyata keçirilməsi Mehriban Əliyevanın humanist fəaliyyətinin mühüm istiqamətləridir. Bu yanaşma göstərir ki, dövlətə xidmət yalnız böyük layihələrlə deyil, eyni zamanda ayrı-ayrı insanların taleyinə həssas münasibətlə, onların həyatına ümid gətirməklə də özünü göstərir.

Azərbaycan xalqı üçün ən müqəddəs dəyərlərdən biri Vətən uğrunda canından keçən şəhidlərimizin əziz xatirəsinə ehtiram və qazilərimizə göstərilən qayğıdır. Şəhid ailələrinin, qazilərin və müharibə iştirakçılarının dövlət səviyyəsində diqqətdə saxlanılması xalqımızın qəhrəmanlarına olan mənəvi borcunun ifadəsidir. Mehriban Əliyevanın sosial və humanitar fəaliyyətində də Vətən qarşısında böyük xidmətləri olan insanların və onların ailələrinin qayğılarına həssas münasibət mühüm yer tutur. Şəhidlərimizin xatirəsinin uca tutulması, onların ailələrinin yanında olmaq və qazilərimizə ehtiram göstərmək milli həmrəyliyimizin ən gözəl nümunələrindəndir.

Mehriban Əliyevanın Azərbaycan mədəniyyətinin qorunması və dünyada tanıdılması istiqamətində fəaliyyəti də böyük əhəmiyyət daşıyır. Hələ 1995-ci ildə onun təşəbbüsü ilə Azərbaycan Mədəniyyət Fondu yaradılıb, bir il sonra isə milli mədəniyyətimizin beynəlxalq auditoriyaya çatdırılması məqsədilə üç dildə nəşr olunan “Azərbaycan – İrs” jurnalının əsası qoyulub. Milli musiqimizin, incəsənətimizin, tarixi abidələrimizin və zəngin mədəni irsimizin təbliği istiqamətində görülən işlər Azərbaycanın mədəni qüdrətinin dünyada daha geniş tanınmasına xidmət edib.

Mehriban Əliyevanın fəaliyyətində səhiyyə və insan sağlamlığı məsələlərinin xüsusi yer tutması da təsadüfi deyil. İxtisasca həkim olan Mehriban Əliyevanın həyat yolunda insan sağlamlığına xidmət mühüm başlanğıc nöqtələrindən biri olub. Onun ana, uşaq və ailə sağlamlığının qorunması istiqamətində fəaliyyəti beynəlxalq səviyyədə də qiymətləndirilib və 2007-ci ildə Dünya Səhiyyə Təşkilatının mükafatına layiq görülüb. Səhiyyə müəssisələrinin imkanlarının genişləndirilməsi, insanların keyfiyyətli tibbi xidmətə çıxışının yaxşılaşdırılmasına yönələn təşəbbüslər humanizm prinsiplərinin praktik ifadəsi kimi böyük əhəmiyyət daşıyır.

Bu baxımdan, biz səhiyyə işçiləri üçün Mehriban xanım Əliyevanın insan sağlamlığına, tibbin inkişafına və humanitar dəyərlərə göstərdiyi münasibət xüsusilə qiymətlidir. Respublika Klinik Xəstəxanasının direktoru, ortoped-travmatoloq Elviz Qasımov olaraq hesab edirəm ki, insan həyatının və sağlamlığının qorunması ən ali və ən şərəfli xidmətlərdən biridir. Həkimin qarşısında dayanan əsas məqsəd insanın sağlamlığını bərpa etmək, ona yenidən normal həyata qayıtmaq üçün ümid verməkdirsə, dövlət səviyyəsində həyata keçirilən sosial və səhiyyə təşəbbüslərinin də əsas qayəsi vətəndaşın rifahına xidmət etməkdir. Mehriban xanım Əliyevanın humanist fəaliyyətində bu prinsipin xüsusi yer tutması səhiyyə ictimaiyyəti tərəfindən də yüksək dəyərləndirilir.

Mehriban Əliyeva Azərbaycan idmanının inkişafında da mühüm xidmətlər göstərib. Onun Azərbaycan Gimnastika Federasiyasına rəhbərliyi dövründə ölkəmizdə gimnastikanın əhatə dairəsi genişlənib, idmançılarımız dünya və Avropa miqyaslı yarışlarda uğurlar əldə edib, müasir Milli Gimnastika Arenası istifadəyə verilib. Azərbaycanın mötəbər beynəlxalq idman yarışlarına uğurla ev sahibliyi etməsi ölkəmizin təşkilatçılıq imkanlarının və beynəlxalq nüfuzunun nümayişinə çevrilib.

Mehriban Əliyevanın fəaliyyətini səciyyələndirən mühüm cəhətlərdən biri də Prezident İlham Əliyevin rəhbərliyi ilə həyata keçirilən dövlət siyasətinə verdiyi dəstəkdir. Azərbaycanın güclənməsi, xalqın rifahının yüksəldilməsi, ölkəmizin beynəlxalq mövqelərinin möhkəmləndirilməsi və milli maraqlarımızın qorunması istiqamətində aparılan siyasətdə onun fəaliyyəti mühüm yer tutur. 2017-ci il fevralın 21-də Prezident İlham Əliyevin sərəncamı ilə Mehriban Əliyevanın Azərbaycan Respublikasının Birinci vitse-prezidenti təyin olunması onun dövlətçilik fəaliyyətində yeni və mühüm mərhələ açıb.

Bu gün Mehriban Əliyeva Azərbaycan qadınının ziyalılığını, güclü iradəsini, milli dəyərlərə sədaqətini və dövlət idarəçiliyində fəal iştirakını özündə birləşdirən tanınmış ictimai-siyasi xadimdir. Onun çoxşaxəli fəaliyyəti Azərbaycan qadınının cəmiyyətdəki yüksək mövqeyinin, intellektual potensialının və humanist dəyərlərə bağlılığının göstəricisidir. Xalqa xidmət etmək, insanların qayğılarına həssas yanaşmaq, milli-mənəvi irsi qorumaq və Azərbaycanı beynəlxalq aləmdə layiqincə təmsil etmək onun fəaliyyətinin əsas istiqamətlərini təşkil edir.

Əlamətdar doğum günü münasibətilə Azərbaycan Respublikasının Birinci vitse-prezidenti Mehriban xanım Əliyevanı səmimi-qəlbdən təbrik edirəm. Ona möhkəm cansağlığı, uzun ömür, ailə səadəti, tükənməz enerji və Azərbaycan dövlətinin qüdrətlənməsi, xalqımızın rifahı naminə həyata keçirdiyi fəaliyyətində yeni-yeni nailiyyətlər arzulayıram. Arzu edirəm ki, xeyirxahlığa, mərhəmətə, dövlətçiliyə və insanlara xidmətə əsaslanan fəaliyyəti bundan sonra da uğurla davam etsin.

Doğum gününüz mübarək, hörmətli Mehriban xanım!

Dərin hörmətlə,
Respublika Klinik Xəstəxanasının direktoru,
ortoped-travmatoloq Elviz Qasımov