26 avqust Azərbaycan Respublikasının Birinci vitse-prezidenti, ölkəmizin birinci xanımı, Heydər Əliyev Fondunun prezidenti Mehriban xanım Əliyevanın doğum günüdür. Bu əlamətdar gün təkcə bir doğum günü kimi deyil, ömrünü dövlətinə və xalqına xidmətə, milli-mənəvi dəyərlərin qorunmasına, humanizm və xeyirxahlıq prinsiplərinin yaşadılmasına həsr edən görkəmli ictimai-siyasi xadimin zəngin fəaliyyət yoluna nəzər salmaq üçün gözəl fürsətdir. Mehriban xanım Əliyevanın illər ərzində formalaşdırdığı nümunəvi fəaliyyət modeli Azərbaycan qadınının yüksək mənəviyyatını, ziyalılığını, güclü iradəsini və dövlətçilik təfəkkürünü özündə birləşdirir.

1964-cü il avqustun 26-da Bakı şəhərində ziyalı ailəsində dünyaya gələn Mehriban xanım Əliyevanın həyat yolunda elmə, təhsilə və yüksək intellektual dəyərlərə bağlılıq mühüm yer tutub. O, orta məktəbi qızıl medalla başa vurduqdan sonra tibb təhsili alıb və ali məktəbi fərqlənmə diplomu ilə bitirib. Sonrakı illərdə isə onun fəaliyyəti təkcə bir sahə ilə məhdudlaşmayaraq mədəniyyətdən təhsilə, səhiyyədən idmana, sosial və humanitar layihələrdən dövlət idarəçiliyinə qədər geniş istiqamətləri əhatə edib.

Mehriban xanım Əliyevanın fəaliyyətinin ən mühüm cəhətlərindən biri hər zaman insan amilini ön planda saxlamasıdır. Cəmiyyətin inkişafının yalnız iqtisadi göstəricilərlə deyil, insanlara göstərilən diqqət, təhsilə yaradılan imkanlar, mədəniyyətin qorunması, səhiyyənin inkişafı və sosial həmrəyliyin gücləndirilməsi ilə ölçüldüyünü onun çoxşaxəli fəaliyyətində aydın görmək mümkündür. Məhz bu yanaşma Mehriban xanım Əliyevanın ictimai fəaliyyətinə xüsusi məzmun və mənəvi dəyər qazandırır.

Heydər Əliyev Fondunun prezidenti kimi onun fəaliyyəti xüsusi əhəmiyyət daşıyır. Fond Ümummilli Lider Heydər Əliyevin zəngin dövlətçilik irsinin öyrənilməsi, milli dövlətçilik ideyalarının yeni nəsillərə çatdırılması istiqamətində mühüm missiya həyata keçirir. Bununla yanaşı, təhsil, səhiyyə, mədəniyyət, sosial müdafiə və humanitar sahələrdə həyata keçirilən təşəbbüslər xeyirxahlığın və insanlara xidmətin cəmiyyət həyatında mühüm dəyərə çevrilməsinə xidmət edir.

Mehriban xanım Əliyevanın fəaliyyətində şəhid ailələrinə və qazilərimizə göstərilən ehtiram da xüsusi mənəvi məna daşıyır. Azərbaycanın azadlığı, ərazi bütövlüyü və suverenliyi uğrunda canından keçmiş şəhidlərimizin əziz xatirəsinin daim uca tutulması, onların ailələrinə qayğı göstərilməsi, Vətən uğrunda sağlamlığını itirmiş qazilərimizin yanında olmaq dövlətimizin mənəvi borcu və xalqımızın dəyişməz dəyəridir. Şəhid ailəsinə göstərilən hər bir diqqət qəhrəmanlarımızın xatirəsinə ehtiramın, qaziyə göstərilən hər bir qayğı isə Vətən qarşısında göstərilən qəhrəmanlığa verilən yüksək qiymətin ifadəsidir.

Azərbaycan mədəniyyətinin qorunması və beynəlxalq aləmdə tanıdılması Mehriban xanım Əliyevanın fəaliyyətində mühüm istiqamətlərdən biridir. Hələ 1995-ci ildə onun təşəbbüsü ilə Azərbaycan Mədəniyyət Fondu təsis edilib, 1996-cı ildə isə milli mədəniyyətimizin geniş təbliğinə xidmət edən “Azərbaycan – İrs” jurnalı yaradılıb. Muğamımızın, musiqimizin, incəsənətimizin, tarixi abidələrimizin və zəngin mədəni irsimizin dünyada tanıdılması istiqamətində görülən işlər Azərbaycan mədəniyyətinin beynəlxalq miqyasda mövqelərinin möhkəmləndirilməsinə xidmət edib.

Mehriban xanım Əliyevanın Azərbaycan idmanının inkişafındakı xidmətləri də diqqətəlayiqdir. Azərbaycan Gimnastika Federasiyasına rəhbərlik etdiyi illər ərzində ölkəmizdə gimnastikanın inkişafı üçün geniş imkanlar yaradılıb, idmançılarımız beynəlxalq arenalarda uğurlar qazanıb, müasir idman infrastrukturu formalaşdırılıb. Milli Gimnastika Arenasının istifadəyə verilməsi də bu sahədə həyata keçirilən mühüm işlərdən biridir. Azərbaycanın mötəbər beynəlxalq idman yarışlarına uğurla ev sahibliyi etməsi ölkəmizin dünyadakı müasir və qüdrətli dövlət imicinin təqdimatına da öz töhfəsini verib.

2017-ci il fevralın 21-də Prezident İlham Əliyevin sərəncamı ilə Mehriban xanım Əliyevanın Azərbaycan Respublikasının Birinci vitse-prezidenti təyin olunması onun dövlətçilik fəaliyyətində yeni və mühüm mərhələnin başlanğıcı oldu. Bu yüksək dövlət vəzifəsində onun fəaliyyəti milli maraqlara sədaqət, dövlətçilik prinsiplərinə bağlılıq və sosial məsələlərə həssas münasibətlə səciyyələnir. Prezident İlham Əliyevin rəhbərliyi ilə Azərbaycanın güclənməsi və qarşıya qoyulan strateji məqsədlərin həyata keçirilməsi istiqamətində görülən işlərdə Mehriban xanım Əliyeva öz fəaliyyəti ilə mühüm rol oynayır.

Mehriban xanım Əliyevanı fərqləndirən əsas xüsusiyyətlərdən biri yüksək dövlətçilik mövqeyi ilə humanist yanaşmanı bir araya gətirməsidir. Dövlət və ictimai fəaliyyətin böyük məsuliyyəti ilə yanaşı, insanların gündəlik qayğılarına diqqət göstərmək, ehtiyacı olanlara dəstək vermək, uşaqların və gənclərin gələcəyinə sərmayə qoymaq, milli irsi gələcək nəsillər üçün qorumaq onun fəaliyyət fəlsəfəsinin mühüm istiqamətləridir. Bu xüsusiyyətlər onun Azərbaycan cəmiyyətində böyük hörmət və rəğbət qazanmasının əsas səbəblərindəndir.

Azərbaycan qadınının tarixən malik olduğu mərhəmət, müdriklik, ailəyə bağlılıq və mənəvi güc kimi yüksək keyfiyyətləri Mehriban xanım Əliyevanın fəaliyyətində müasir dövlətçilik düşüncəsi ilə vəhdət təşkil edir. O, həm Azərbaycan qadınının beynəlxalq aləmdə layiqli təmsilçisi, həm də ölkənin ictimai-siyasi həyatında mühüm rol oynayan dövlət xadimi kimi seçilir. Onun fəaliyyəti göstərir ki, Vətənə xidmət həm dövlət qarşısında böyük məsuliyyət daşımaq, həm də insanların sevincinə və qayğısına həssaslıqla yanaşmaq deməkdir.

Bu gün – 26 avqust tarixində Mehriban xanım Əliyevanı doğum günü münasibətilə ürəkdən təbrik edirəm. Ona möhkəm cansağlığı, uzun və mənalı ömür, ailə səadəti, tükənməz enerji, xalqımızın rifahı və qüdrətli Azərbaycan naminə həyata keçirdiyi dövlətçilik və ictimai fəaliyyətində davamlı uğurlar arzulayıram. Qoy qarşıdakı illər yeni nailiyyətlərlə, xeyirxah təşəbbüslərlə və Azərbaycan dövlətinin tərəqqisinə xidmət edən uğurlarla zəngin olsun.

Hörmətli Mehriban xanım, doğum gününüz mübarək! Sizə Prezident İlham Əliyevlə birlikdə qüdrətli Azərbaycanın gələcəyi, xalqımızın rifahı və dövlətimizin daha böyük zirvələrə yüksəlməsi naminə fəaliyyətinizdə yeni-yeni uğurlar arzulayıram.

Dərin hörmətlə,
Dilqəm Həkim