2 iyul – Azərbaycan Polisi Günü münasibətilə ölkəmizin müxtəlif bölgələrində hüquq-mühafizə orqanlarında çalışan zabitlər və əməkdaşlar təbrik edilir, onların cəmiyyətə verdiyi xidmətlər xüsusi hörmətlə yad olunur. Bu gün, qanunun aliliyini və insan həyatının təhlükəsizliyini ön planda tutan, daim səngərdə olan bir peşənin – polis xidmətinin təntənəsidir.

Bu əlamətdar gündə Bərdə Rayon Polis Şöbəsinin Dövlət Yol Polisi Bölməsinin rəisi, polis mayoru Emin Musayevin ölkəmizin hüquq-mühafizə sistemində göstərdiyi əvəzsiz xidmətləri xüsusi qeyd etməyə dəyər.

Emin Musayev yalnız Bərdədə deyil, bütövlükdə region səviyyəsində yol təhlükəsizliyi sahəsində peşəkar fəaliyyəti ilə seçilən bir rəhbərdir. Onun rəhbərliyi ilə həyata keçirilən islahatlar, intizam və nəzarət mexanizmləri sayəsində rayon ərazisində yol hərəkəti qaydalarına riayət etmə göstəriciləri əhəmiyyətli şəkildə artmışdır. Bu isə təkcə rəqəmlərlə deyil, insanların gündəlik həyatında hiss olunan rahatlıq və təhlükəsizliklə ölçülür.

Sürücülərlə səmimi ünsiyyət, maarifləndirmə yönümlü görüşlər, məktəblərdə gənc nəqliyyat iştirakçılarına yönəlik təlimlər, ictimai təhlükəsizliyə yönəlmiş profilaktik tədbirlər Emin Musayevin xidmət fəlsəfəsinin əsas sütunlarını təşkil edir. O, idarəçiliyində yalnız cəza yönümlü deyil, maarifləndirici və yönləndirici yanaşmanı əsas tutur ki, bu da onu fərqləndirən ən mühüm xüsusiyyətlərdəndir.

Emin Musayevin adı DYP strukturu daxilində dürüstlük, şəffaflıq və etik davranış prinsipləri ilə assosiasiya olunur. Onun rəhbərlik etdiyi bölmədə sürücülər və vətəndaşlar ilə qarşılıqlı hörmətə əsaslanan sağlam ünsiyyət mühiti formalaşıb. Hər bir müraciətə həssaslıqla yanaşılır, hər bir problemin həlli üçün müasir, çevik və qanuna əsaslanan yanaşmalar tətbiq edilir.

Bu uğurlar, şübhəsiz, Daxili İşlər Naziri, general-polkovnik Vilayət Eyvazovun rəhbərliyi ilə daxili işlər orqanlarında həyata keçirilən yeni nəsil idarəetmə modelinin real nəticələridir. Emin Musayev bu modelin rayon səviyyəsində uğurla tətbiq edən, ona sadiq qalan və daim təkmilləşməyə açıq olan rəhbərlər sırasındadır.

Əlbəttə, bu sabit və etibarlı hüquqi sistemin formalaşmasında Prezident İlham Əliyevin dövlətçiliyə və hüquq sisteminə verdiyi önəmin mühüm rolu var. Məhz bu siyasi iradə sayəsində ölkəmizdə ictimai asayiş qorunur, vətəndaşların hüquqları təmin olunur və cəmiyyətin hər bir üzvü özünü təhlükəsizlikdə hiss edir.

Faktsubut.com kollektivi adından polis mayoru Emin Musayevi bu şərəfli peşə bayramı münasibətilə təbrik edir, ona möhkəm sağlamlıq, güclü iradə, davamlı uğurlar və vətəndaşların etimadını daima doğrultmağı arzulayırıq.

Yol mədəniyyətinin keşikçilərinə təşəkkürlər!
Azərbaycan Polisi Günü mübarək olsun!