Hər xalqın tarixində elə günlər olur ki, onlar təqvimdə sadəcə rəqəm deyil, qəlblərdə bayram kimi yaşayır. 25 oktyabr 2020-ci il Azərbaycan xalqı üçün belə günlərdən biridir. Həmin gün Qubadlı şəhəri otuz ilə yaxın həsrətdən sonra yenidən öz sahiblərinə qovuşdu. Bu münasibətlə hər il oktyabrın 25-i Qubadlı şəhəri günü kimi qeyd olunur.
Qubadlı rayonu Azərbaycanın cənub-qərbində, Qarabağ yaylasının cənub-şərqində yerləşir. 1993-cü ilin avqustunda erməni silahlı birləşmələri tərəfindən işğal olunan bu qədim diyar uzun illər sükut içində qaldı. Rəsmi İrəvanın qanunsuz məskunlaşma siyasəti nəticəsində torpaqlarımızın tarixi simasını dəyişdirməyə cəhdlər edildi. Lakin heç bir qəsb haqqın üzərində əbədi qala bilməzdi.
Beynəlxalq hüquqa görə, işğal altındakı ərazilərdə qanunsuz məskunlaşma yolverilməzdir və bu, dövlətlərin ərazi bütövlüyü prinsipinin pozulması deməkdir. Azərbaycan öz suveren ərazilərini azad etmək hüququnu cənab Prezident, Müzəffər Ali Baş Komandan İlham Əliyevin rəhbərliyi ilə həyata keçirdi. Ulu öndər Heydər Əliyevin əsasını qoyduğu qüdrətli dövlət ənənəsi və xalqın birliyi bu Zəfərin ən böyük təməli oldu.
Cənab Prezident, Müzəffər Ali Baş Komandan İlham Əliyevin sözləri ilə desək, Qubadlıya öz sahibləri qayıdıb. Dövlət başçısı Qubadlının işğaldan azad edilməsini tarixi hadisə adlandırmış və oktyabrın 25-də şəhərin azad olunmasının qələbəmizi yaxınlaşdırdığını vurğulamışdır. Bu fikirlər həmin günün əhəmiyyətini bir cümlədə ifadə edir. Qubadlı rayonu tamamilə işğaldan azad edildi və bu azadlıq xalqımızın yaddaşına qızıl hərflərlə həkk olundu.
2020-ci il dekabrın 23-də cənab Prezident, Müzəffər Ali Baş Komandan İlham Əliyevin azad olunmuş Qubadlıya səfəri zamanı şəhərdə Azərbaycan bayrağı ucaldıldı. Üçrəngli bayrağımız Qubadlı səmasında dalğalananda şəhidlərimizin ruhu şad oldu, qazilərimizin gözləri işıqlandı. Bu bayraq təkcə parça deyil, torpağa, vətənə və ədalətə sədaqətin simvoludur.
Qubadlının yeni inkişaf tarixi də başlanıb. 2023-cü il sentyabrın 5-də cənab Prezident İlham Əliyev "Yeni Qubadlı-Laçın avtomobil yolunun layihələndirilməsi və tikintisi ilə bağlı tədbirlər haqqında" Sərəncam imzalamışdır. Bu yol yalnız iki bölgəni birləşdirmir, həm də xalqı doğma yurda, keçmişi gələcəyə bağlayır. Dağıdılmış şəhərdə yeni evlər, yollar, məktəblər və abadlıq işləri həyata keçirilir.
Nəticə olaraq, 25 oktyabr Qubadlı şəhəri günü bizə Vətən sevgisinin, birliyin və dövlətə sədaqətin böyük dərsini verir. Bu gün Qubadlıda səhər günəşi yenidən doğur, çiçəklər açır, azad torpağın üzərində sülh və yaradıcılıq səsləri yüksəlir. Bizim borcumuz isə bu Zəfəri qorumaq, şəhidlərimizin xatirəsini əziz tutmaq və gələcək nəsilləri Vətən məhəbbəti ruhunda tərbiyə etməkdir.
Heydərli Fərzanə
Bakı şəhəri Sabunçu rayonu Xavər Vəliyev adına 75 nömrəli tam orta məktəbin ibtidai sinif müəllimi