Qubadlı Azərbaycanın qədim tarixi, zəngin mədəniyyəti və füsunkar təbiəti ilə seçilən strateji bölgələrindən biridir. Zəngin keçmişə malik olan bu diyar xalqımızın yaddaşında hər zaman özünəməxsus yer tutub. Qubadlının azadlığı, yenidən qurulması və dirçəlişi Azərbaycan xalqının Vətənə bağlılığının, milli birliyinin və sarsılmaz qələbə əzminin parlaq təcəssümüdür.

1993-cü il avqustun 31-də Ermənistan silahlı birləşmələri tərəfindən işğal edilən Qubadlı 27 il ərzində doğma sakinlərindən ayrı qaldı. İşğal nəticəsində rayonun yaşayış məntəqələrinə, tarixi-mədəni abidələrinə və sosial-iqtisadi infrastrukturuna ciddi ziyan dəydi, minlərlə soydaşımız doğma yurdunu tərk etmək məcburiyyətində qaldı. Lakin qubadlıların qəlbində doğma torpağa qayıtmaq ümidi və inamı heç vaxt sönmədi.

2020-ci ilin Vətən müharibəsi Azərbaycanın müstəqillik tarixinə qızıl hərflərlə yazıldı. Müzəffər Ali Baş Komandan İlham Əliyevin rəhbərliyi altında rəşadətli Azərbaycan Ordusu oktyabrın 25-də Qubadlı şəhərini və rayonun kəndlərini düşmən tapdağından azad etdi. Bu tarixi Zəfər 27 illik əsarətə son qoymaqla yanaşı, bölgənin həyatında tamamilə yeni bir inkişaf səhifəsi açdı. Məhz həmin gündən etibarən Qubadlının yeni inkişaf tarixi başlandı və ərazidə genişmiqyaslı quruculuq mərhələsinin əsası qoyuldu.

İşğaldan azad edilmiş ərazilərdə həyata keçirilən layihələr Qubadlının da simasını köklü şəkildə dəyişir. Dağıdılmış infrastrukturun yenilənməsi, yeni avtomobil yollarının çəkilməsi, dayanıqlı elektrik enerjisi və rabitə təminatının qurulması, yaşayış məntəqələrinin bərpası rayonun gələcək dayanıqlı inkişafının təməlini təşkil edir.

Qubadlının gələcək görünüşünü və inkişaf prioritetlərini müəyyən edən mühüm addımlardan biri şəhərin 2040-cı ilədək inkişafına dair Baş planının 2025-ci il sentyabrın 9-da təsdiq edilməsidir. Bu plan şəhərin müasir urbanizasiya standartlarına uyğun planlaşdırılmasını nəzərdə tutur. Şəhər mərkəzində ilk çoxmənzilli yaşayış binalarının inşasına başlanılmış, eyni zamanda Mahruzlu və Zilanlı kəndlərinin müasir standartlara uyğun təməlləri qoyulmuşdur. Yeni infrastruktur layihələri, təhsil və səhiyyə müəssisələrinin yaradılması Qubadlının müasir şəhərə çevrilməsinə xidmət edir.

Qubadlının dirçəlişi yalnız binaların tikilməsi və yolların salınması ilə məhdudlaşmır. Bu proses həm də tarixi-mədəni irsin qorunmasını, milli dəyərlərin yaşadılmasını, təhsil və mədəniyyətin inkişafını əhatə edir. Doğma yurda qayıdan insanların təhlükəsiz, rahat və firavan yaşaması üçün bütün lazımi şərait yaradılır. Qubadlının yenidən dirçəlməsi gələcək nəsillərə ötürüləcək mühüm tarixi mirasdır.

Bu gün Qubadlı azadlığın, ümidin və yenidən doğuluşun rəmzidir. Qubadlının yeni inkişaf tarixi qəhrəmanlıqla yazılıb, zəfərlə təsdiqlənib və böyük quruculuq işləri ilə davam edir. Yaxın gələcəkdə Qubadlının küçələrində uşaq səsləri eşidiləcək, məktəblərində təhsil həyatı canlanacaq, parklarında həyat yenidən qaynayacaq. Qubadlı yenidən qurulur, canlanır və gələcəyə doğru inamla addımlayır.

Solmaz Cəbrayılova,

Sabunçu qəsəbəsi, 170 saylı tam orta ümumtəhsil məktəbin kitabxanaçısı