Azərbaycan xalqının tarixində elə günlər var ki, onlar yalnız təqvimdə bir tarix deyil, həm də milli qürurun, qəhrəmanlığın, birliyin və Zəfərin rəmzi kimi yaddaşlara həkk olunur. 2020-ci il oktyabrın 25-i də belə əlamətdar günlərdən biridir. Həmin gün Qubadlı şəhəri işğaldan azad edildi və Azərbaycanın ərazi bütövlüyünün bərpası istiqamətində mühüm tarixi addım atıldı. Qubadlının azadlığı illərlə doğma yurd həsrəti çəkən insanların qəlbində yeni ümidlər yaratdı, xalqımızın haqq mübarizəsinin təntənəsinə çevrildi.

Qubadlı rayonu Azərbaycanın dilbər guşələrindən biridir.Zəngin təbiəti, uca dağları, yaşıl meşələri, çayları və qədim yaşayış məskənləri ilə seçilən bu torpaq tarixən özünəməxsus mədəniyyəti və adət-ənənələri ilə tanınıb. Burada yaşayan insanlar doğma torpaqlarına bağlılıqları, zəhmətkeşlikləri və qonaqpərvərlikləri ilə seçiliblər. Lakin 1993-cü ildə Qubadlı Ermənistan silahlı qüvvələri tərəfindən işğal olundu. Rayonun sakinləri öz evlərini tərk etməyə məcbur oldular, ailələr doğma ocaqlarından uzaq düşdülər. İllərlə davam edən məcburi köçkünlük dövründə Qubadlı sakinləri öz yurdlarına qayıtmaq arzusu ilə yaşadılar. Doğma evlərin, uşaqlıq xatirələrinin və ata-baba torpaqlarının həsrəti onların qəlbində heç vaxt sönmədi.

Azərbaycan xalqı bu illər ərzində torpaqlarının işğalı ilə barışmadı. Dövlətimiz ərazi bütövlüyünün bərpasını əsas məqsədlərindən biri kimi müəyyənləşdirdi. Ulu öndər Heydər Əliyevin müəyyən etdiyi dövlətçilik strategiyası, milli birlik və müstəqilliyin qorunması ideyaları Azərbaycanın gələcək inkişafında mühüm rol oynadı. Onun xalq qarşısında xidmətləri və dövlətçilik irsi sonrakı illərdə də ölkəmizin inkişafına təsir göstərdi.

2020-ci il sentyabrın 27-də başlayan Vətən müharibəsi Azərbaycan tarixində yeni bir mərhələnin əsasını qoydu. Ali Baş Komandan cənab prezident İlham Əliyevin rəhbərliyi ilə Azərbaycan Ordusu işğal altında olan torpaqlarımızın azadlığı uğrunda əks-hücum əməliyyatlarına başladı. Əsgər və zabitlərimizin misilsiz qəhrəmanlığı, xalqımızın birliyi, arxa cəbhədə göstərilən dəstək və dövlətimizin qətiyyətli mövqeyi qələbəyə gedən yolu müəyyənləşdirdi. Azərbaycan əsgəri hər qarış torpaq uğrunda mübarizə apararaq xalqımızın illərlə gözlədiyi tarixi ədalətin bərpasına nail oldu.

Qubadlının azad edilməsi Vətən müharibəsinin ən mühüm hadisələrindən biri idi. Şəhərin strateji mövqeyi hərbi əməliyyatlar baxımından böyük əhəmiyyət daşıyırdı. Oktyabrın 25-də Qubadlı şəhərinin azad olunması Azərbaycan Ordusunun döyüş meydanındakı üstünlüyünü və xalqımızın iradəsini bir daha nümayiş etdirdi. Bu qələbə digər istiqamətlərdə aparılan əməliyyatlar üçün də mühüm əhəmiyyət kəsb etdi. Qubadlı səmasında üçrəngli Azərbaycan bayrağının yenidən dalğalanması illərlə doğma yurduna həsrət qalan insanlar üçün unudulmaz bir sevincə çevrildi

Cənab prezident İlham Əliyev Qubadlının azad edilməsini Azərbaycanın tarixi qələbəsinin mühüm tərkib hissəsi kimi qiymətləndirdi. 2020-ci il dekabrın 23-də Qubadlıya səfəri zamanı şəhərdə Azərbaycan bayrağını ucaltdı. Bu hadisə dövlətimizin suverenliyinin, xalqımızın əzminin və torpaqlarımıza qayıdış iradəsinin rəmzi oldu. Prezidentin azad edilmiş ərazilərə səfərləri, burada aparılan bərpa və quruculuq işlərinə nəzarəti həmin torpaqların yenidən dirçəldilməsinə verilən xüsusi əhəmiyyətin göstəricisidir

Qubadlının azadlığı yalnız hərbi qələbə ilə məhdudlaşmır. Bu hadisə həm də tarixi yaddaşın qorunması, milli kimliyin möhkəmləndirilməsi və doğma yurda qayıdış ümidinin gerçəkləşməsi deməkdir. İşğal dövründə rayonun yaşayış məntəqələrinə, tarixi və mədəni irsinə ciddi ziyan dəymişdi. Buna görə də azadlıqdan sonra qarşıda duran əsas vəzifələrdən biri dağıdılmış infrastrukturun bərpası, əhalinin təhlükəsiz qayıdışının təmin edilməsi və bölgədə normal həyat şəraitinin yaradılması oldu.

Bu gün Qubadlıda genişmiqyaslı quruculuq işləri həyata keçirilir. Yol və nəqliyyat infrastrukturu yenilənir, elektrik enerjisi və digər kommunal xidmətlərin bərpası istiqamətində tədbirlər görülür, yaşayış məntəqələri yenidən qurulur. Xanlıq, Mahruzlu və Zilanlı kimi kəndlərdə həyata keçirilən layihələr doğma torpaqlarda həyatın yenidən canlanmasına xidmət edir. Qubadlı şəhərində yaşayış məhəllələrinin, inzibati binaların, təhsil və səhiyyə müəssisələrinin yaradılması bölgənin gələcək inkişafı üçün mühüm zəmin formalaşdırır. Bu layihələr keçmiş məcburi köçkünlərin öz evlərinə qayıtması və doğma torpaqlarında yeni həyat qurması baxımından böyük əhəmiyyət daşıyır.

Qubadlı şəhərinin azad olunmasının tarixi əhəmiyyətini yaşatmaq məqsədilə Azərbaycan Respublikasının Prezidenti cənab prezident İlham Əliyevin 2023-cü il 31 iyul tarixli Sərəncamı ilə oktyabrın 25-i Qubadlı Şəhəri Günü kimi təsis edilib. Bu gün hər il ölkəmizdə qeyd olunur və Qubadlının azadlığı uğrunda mübarizə aparan qəhrəmanların xatirəsinə ehtiramın ifadəsinə çevrilir. Qubadlı Şəhəri Günü həm də gənc nəslə Vətən sevgisini, milli həmrəyliyi və tarixi yaddaşı aşılamaq baxımından mühüm əhəmiyyət daşıyır.

Bu əlamətdar gün bizə xatırladır ki, Vətən torpağı xalqın ən böyük sərvəti, azadlıq isə onun ən qiymətli nemətidir. Qubadlının azadlığı Azərbaycan xalqının sarsılmaz iradəsinin, ordumuzun gücünün və dövlətimizin qətiyyətinin nəticəsidir. Bu qələbə şəhidlərimizin qanı, qazilərimizin fədakarlığı və əsgərlərimizin qəhrəmanlığı hesabına qazanılıb. Onların göstərdiyi şücaət heç vaxt unudulmayacaq, adları xalqımızın yaddaşında daim yaşayacaq.

Qubadlının azad edilməsi tariximizdə əbədi yaşayacaq. Bu qələbə bir daha sübut etdi ki, xalq öz torpağına, dövlətinə və gələcəyinə inamını itirmədikdə ən çətin sınaqlardan belə qalib çıxa bilər. Qubadlı rayonu Azərbaycanın ayrılmaz hissəsidir və onun azadlığı milli qürurumuzun, tarixi ədalətin və Zəfərimizin rəmzidir.

Qubadlı azaddır! Qubadlı dirçəlir! Doğma yurda qayıdış, milli birlik və Zəfər ruhu daim yaşayacaq!

Xavər Vəliyev adına 75 Nömrəli tam orta məktəbin Azərbaycan dili və Ədəbiyyatı müəllimi Cəfərova Nərmin.