Bakıda keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) 7-ci Zirvə Görüşündə cənab prezident İlham Əliyev tərəfindən səsləndirilən fikirlər həm regional təhlükəsizlik, həm də qlobal ədalətin bərqərar olunması baxımından mühüm əhəmiyyət kəsb edir. Coğrafi olaraq Asiya ilə Avropanın kəsişməsində yerləşən Azərbaycan ikitərəfli və çoxtərəfli əməkdaşlıq formatları vasitəsilə Avrasiya məkanında etibarlı birləşdirici mərkəzə çevrilmişdir.
Dövlətimizin xarici siyasəti bərabərhüquqluluq, ölkələrin ərazi bütövlüyü və daxili işlərə qarışmama ilkələrinə dayanır. Lakin müstəqilliyini bərpa etdiyi 35 il ərzində Azərbaycan davamlı olaraq ikili standartlarla üzləşmişdir. Torpaqlarımızın 20 faizi 30 il ərzində işğal altında qalmış, bir milyon soydaşımız etnik təmizləməyə məruz qalmışdır. BMT Təhlükəsizlik Şurasının 4 qətnaməsi kağız üzərində qalmış, ATƏT-in Minsk qrupu isə fəaliyyətini yalnız imitasiya edərək münaqişəni dondurmağa çalışmışdır.
Ermənistanın davam edən hərbi təxribatları qarşısında Azərbaycan xalqının səbri tükənmiş və 2020-ci ilin 44 günlük Vətən müharibəsi ilə işğala son qoyulmuşdur. 2023-cü ilin sentyabrında həyata keçirilən bir sutkadan da az sürən tədbirlərlə ölkəmiz suverenliyini və ərazi bütövlüyünü tam bərpa etmiş, separatizmə son qoymuşdur. Təhdid saçan müharibə cinayətkarları isə bugün Azərbaycan məhkəməsi qarşısında cavab verirlər.
Cənab president İlham Əliyev qeyd etmişdir ki, bütün bu tarixi Zəfərə və çəkilən əzablara baxmayaraq, Azərbaycan mülki əhaliyə qisas yanaşması göstərməmiş, əksinə, cəsarətli addım ataraq Ermənistana sülh təklif etmişdir.
Azərbaycan AQEM-ə iki illik sədrliyi dövründə də nəqliyyat, rəqəmsallaşma, ətraf mühit və təhsil kimi sahələrdə fəal təşəbbüslər irəli sürərək təşkilatın institusional gücünü artırmışdır. Azərbaycanın təcrübəsi göstərir ki, beynəlxalq hüququn və ədalətin bərqərar olunması regionda davamlı sülhün və tərəqqinin yeganə zəmanətidir.
T. İsgəndərov adına 142№li tam orta ümumtəhsil məktəbinin müəllimi Leyla İsmayılova