Sülh hər xalqın ən böyük arzusudur, lakin o, yalnız haqq və ədalət zəminində möhkəm ola bilər. 2020-ci ilin Zəfərindən sonra Azərbaycan üç il ərzində öz suverenliyinin tam bərpası məsələsini sülh yolu ilə həll etməyə çalışdı. Bu dövrdə dövlətimiz səbirlə danışıqlara üstünlük verdi, hər fürsəti qarşı tərəfə uzadılan əl kimi dəyərləndirdi.
Lakin Ermənistan atəşkəsdən sülh yolunda addım atmaq üçün deyil, öz hərbi qüvvəsini bərpa etmək üçün fürsət kimi istifadə edirdi. Bu məqsədlə artıq Qərbdən olan yeni havadarlarının köməyinə arxalanır, Azərbaycana yenidən hücum etmək planları qururdu. Sülh çağırışlarına cavab olaraq sərhəddə təxribatlar, minalanma halları və hərbi texnikanın yığılması davam edirdi.
Beynəlxalq hüquq baxımından hər bir dövlət öz ərazisində suverenliyini təmin etmək, qanunsuz silahlı birləşmələri zərərsizləşdirmək və vətəndaşlarının təhlükəsizliyini qorumaq hüququna malikdir. Azərbaycanın Konstitusiyası da dövlətin ərazi bütövlüyünün qorunmasını əsas vəzifələrdən biri kimi müəyyən edir. Bu hüquq Ermənistanın 2022-ci ilin oktyabrında Azərbaycanın ərazi bütövlüyünü tanıması ilə daha da möhkəmlənmişdi.
2023-cü ilin sentyabrında məhz bu baş verdi. Sentyabrın 19-da başlayan lokal xarakterli antiterror tədbirləri qısa müddətdə başa çatdı və həmin vaxt Azərbaycan əsgərinin "Dəmir yumruğu" yenidən öz sözünü dedi. Bu söz gurultulu şüarlarla deyil, intizamla, peşəkarlıqla və mülki əhalinin təhlükəsizliyinə ciddi diqqətlə deyildi. Beləliklə, otuz il ərzində yaranmış ədalətsizlik aradan qaldırıldı.
Bu hadisə bir daha göstərdi ki, güc ədalətə xidmət etdikdə həm hüquqi, həm mənəvi baxımdan haqlıdır. Azərbaycan əsgəri düşmənlə döyüşdüyü kimi, həm də öz xalqının dinc gələcəyi uğrunda mübarizə aparır. Onun addımlarında Vətən sevgisi, dövlətinə sədaqət və qalib xalqın qürur duyğusu birləşir.
Nəticə olaraq, bu gün Azərbaycan suverenliyini tam bərpa etmiş dövlət kimi region üçün sülh, təhlükəsizlik və əməkdaşlıq gündəliyi irəli sürür. Dəmir yumruq lazım gələndə sözünü deməyi bacarsa da, onun arxasında açıq əl, yəni sülhə, abadlığa və gələcəyə uzanan əl dayanır.
Heydərli Fərzanə
Bakı şəhəri Sabunçu rayonu Xavər Vəliyev adına 75 nömrəli tam orta məktəbin ibtidai sinif müəllimi