Heydər Əliyev Azərbaycanın dövlətçilik tarixində mühüm rol oynamış böyük siyasi xadimdir. Onun siyasi fəaliyyətində əsas məqsədlərdən biri güclü və müstəqil Azərbaycan dövlətinin qurulması və inkişafı olmuşdur. Heydər Əliyevin hakimiyyətə qayıdışından sonra Yeni Azərbaycan Partiyasının ölkənin siyasi həyatında rolu daha da artdı. Partiyanın keçdiyi tarixi yol və əldə etdiyi nəticələr onun cəmiyyətdə mühüm siyasi qüvvəyə çevrildiyini göstərir.
Yeni Azərbaycan Partiyası Azərbaycanın çətin bir dövr yaşadığı vaxtda yaradıldı. Həmin illərdə ölkədə siyasi və iqtisadi vəziyyət ağır idi. Cəmiyyətdə ciddi narahatlıq hökm sürür, ölkənin gələcəyi ilə bağlı müxtəlif problemlər yaşanırdı. Belə bir şəraitdə Azərbaycan ziyalıları ölkənin vəziyyətindən çıxış yolu tapmaq üçün yeni siyasi təşkilatın yaradılması təşəbbüsünü irəli sürdülər.
1990-cı illərin əvvəllərində müxtəlif siyasi partiyalar və təşkilatlar yaransa da, ölkədəki problemlər öz həllini tapmadı. Siyasi qarşıdurmalar və iqtisadi çətinliklər vəziyyəti daha da mürəkkəbləşdirdi. Bu vəziyyət ziyalıları və ölkənin gələcəyi üçün narahat olan insanları yeni addımlar atmağa vadar etdi.
Belə bir vaxtda 91 nəfər Azərbaycan ziyalısı Naxçıvanda olan Heydər Əliyevə müraciət göndərdi. “91-lərin müraciəti” adı ilə tanınan bu sənəddə ölkənin gələcəyi ilə bağlı narahatlıq və siyasi dəyişikliklərə ehtiyac ifadə olunurdu. Ziyalılar Heydər Əliyevdən yeni yaradılacaq siyasi partiyaya rəhbərlik etməsini xahiş etdilər.
Yeni Azərbaycan Partiyası 1992-ci ildə yaradıldıqdan sonra qısa müddət ərzində ölkənin siyasi həyatında mühüm yer tutmağa başladı. 1992-2003-cü illər partiyanın formalaşması və inkişafı baxımından xüsusi mərhələ oldu. Bu dövr Heydər Əliyevin siyasi fəaliyyəti ilə sıx bağlıdır.
1993-cü il oktyabrın 3-də Heydər Əliyevin Azərbaycan Respublikasının Prezidenti seçilməsi ölkənin siyasi həyatında yeni mərhələnin başlanmasına səbəb oldu. Bundan sonra Yeni Azərbaycan Partiyasının fəaliyyəti də genişləndi və partiya ölkənin aparıcı siyasi qüvvələrindən birinə çevrildi.
Heydər Əliyev YAP-ın yaradılmasını ölkənin və xalqın qarşılaşdığı problemlərin həlli üçün yaranmış zərurətlə əlaqələndirirdi. Onun fikrincə, partiyanın əsas məqsədi xalqın maraqlarına xidmət etmək, müstəqil Azərbaycanın möhkəmlənməsinə və inkişafına töhfə vermək idi.
2003-cü ildə İlham Əliyevin Prezident seçilməsi, 2005-ci ildə isə Yeni Azərbaycan Partiyasının sədri olması ilə partiyanın və ölkənin siyasi həyatında yeni mərhələ başladı. Sonrakı illərdə müxtəlif sahələrdə islahatlar həyata keçirildi. Bu proses Azərbaycanın iqtisadi və siyasi inkişafına, beynəlxalq əlaqələrinin genişlənməsinə və dövlətin mövqeyinin möhkəmlənməsinə təsir göstərdi.
2020-ci ildə baş verən 44 günlük Vətən müharibəsi Azərbaycanın tarixində mühüm hadisə oldu. Müharibə nəticəsində ölkənin ərazi bütövlüyü bərpa edildi. Hazırda işğaldan azad edilmiş ərazilərdə geniş bərpa və quruculuq işləri aparılır. Keçmiş məcburi köçkünlərin doğma torpaqlarına qayıtması üçün Böyük Qayıdış proqramı həyata keçirilir.
2021-ci il martın 5-də Yeni Azərbaycan Partiyasının VII Qurultayı keçirildi. Qurultayda partiyanın gələcək fəaliyyəti ilə bağlı yeni vəzifələr müəyyən edildi, rəhbər və idarəetmə strukturlarında dəyişikliklər aparıldı. Bu toplantı partiyanın fəaliyyətində yeni mərhələnin başlanğıcı kimi qiymətləndirildi.
Bu gün Heydər Əliyevin siyasi irsinə əsaslanan dövlətçilik siyasəti davam etdirilir. Azərbaycanın inkişafı, dövlət müstəqilliyinin möhkəmləndirilməsi və ölkənin gələcək hədəflərinə çatması istiqamətində işlər davam etdirilir.
İradə Məlikova
74 nömrəli tam orta məktəbin ibtidai sinif müəllimi