Müasir beynəlxalq münasibətlər sistemində regional blokların və strateji tərəfdaşlıqların rolu sürətlə artmaqdadır. Bu dinamik qlobal şəraitdə ortaq tarixi, mədəni və etnik köklərə malik olan Türk Dövlətləri Təşkilatı (TDT) regional əməkdaşlıq çərçivəsini aşaraq beynəlxalq arenada çəkisi hər gün daha da yüksələn müstəqil bir güc mərkəzinə çevrilmişdir. Azərbaycan Respublikasının Prezidenti İlham Əliyevin qeyd etdiyi kimi, «Türk dünyası bizim ailəmizdir» konsepti bu gün təkcə mənəvi həmrəyliyi deyil, həm də çoxşaxəli siyasi, iqtisadi və təhlükəsizlik əməkdaşlığını ehtiva edən strateji xəttin əsasını təşkil edir.
Prezident İlham Əliyevin TDT-yə üzv ölkələrin təhlükəsizlik üzrə rəhbər şəxsləri ilə Bakıdakı görüşündə bəyan etdiyi prinsiplər göstərir ki, təşkilata üzv dövlətlər arasındakı münasibətlər artıq ikitərəfli müstəvidə ən yüksək hüquqi zirvəyə çatmışdır. Azərbaycanın Türkiyə, Qazaxıstan, Qırğızıstan və Özbəkistanla imzaladığı müttəfiqlik və strateji tərəfdaşlıq haqqında sənədlər qardaşlıq bağlarının möhkəm təməllər üzərində qurulduğunu əyani şəkildə sübut edir. Dövlət başçılarının intensiv qarşılıqlı səfərləri, beynəlxalq platformalarda vahid mövqedən çıxış etmə ənənəsi və qarşılıqlı etimad mühiti bu böyük ailənin həmrəyliyini daha da sarsılmaz edir.
Digər tərəfdən, bu gün «türk ailəsi» daxilində qurulan koordinasiya Avrasiya məkanında və ümumilikdə dünyada sabitliyin əsas təminatçılarından biri kimi çıxış edir. Təhlükəsizlik şuralarının rəhbərlərinin mütəmadi görüşləri sərhədlərin qorunması, informasiya təhlükəsizliyi və yeni çağırışlara qarşı birgə mübarizə sahəsində əməkdaşlığı ən yüksək səviyyəyə qaldırır. Müasir dövrdə təhlükəsizliyin ən vacib şərtlərindən sayılan enerji ehtiyatları və nəqliyyat-tranzit dəhlizləri də məhz bu coğrafiyadan keçir. Türk dünyasının malik olduğu nəhəng potensial və strateji mövqe ailə daxilindəki hər bir dövlətin suverenliyini möhkəmləndirir, xalqların rifahını yüksəldir.
Yekun olaraq qeyd etmək olar ki, «Türk dünyası bizim ailəmizdir» fəlsəfəsi gələcək nəsillərə ötürüləcək ən qiymətli milli və tarixi irsdir. Bakıda qəbul edilən mühüm qərarlar və birgə atılan addımlar sübut edir ki, vahid soy-kök, ortaq dil və strateji maraqlar üzərində ucalan bu böyük birlik XXI əsrdə qlobal ədalətin, regional sülhün və dayanıqlı inkişafın ən etibarlı dayaqlarından biri olaraq qalacaqdır.

Məktəbdənkənar və sinifdənxaric işlər üzrə təşkilatçı
Bakı şəhəri 198 nömrəli tam orta məktəb    
Abdullayeva Rüfanə