22 iyul Azərbaycan xalqının ictimai-siyasi və mədəni həyatında mühüm əhəmiyyət daşıyan günlərdən biridir. Bu tarix ölkəmizdə Milli Mətbuat Günü kimi qeyd olunur. Məhz 1875-ci il iyulun 22-də görkəmli maarifçi və ziyalı Həsən bəy Zərdabi tərəfindən Azərbaycan dilində ilk milli qəzet olan "Əkinçi" nəşr edilmişdir. Bu hadisə Azərbaycan milli mətbuatının əsasını qoymuş, xalqın maariflənməsi, milli şüurun formalaşması və ictimai fikrin inkişafında mühüm rol oynamışdır. Hər il qeyd olunan Milli Mətbuat Günü milli mətbuatımızın keçdiyi şərəfli yolu xatırlamaqla yanaşı, bu sahədə çalışan insanların əməyinə verilən yüksək dəyərin ifadəsidir.Azərbaycan milli mətbuatının banisi olan Həsən bəy Zərdabi öz fəaliyyəti ilə xalqın elmə, təhsilə və tərəqqiyə yönəlməsinə böyük töhfələr vermişdir. O dövrdə cəmiyyətin müxtəlif problemlərini sadə və anlaşıqlı dillə oxuculara çatdıran "Əkinçi" qəzeti kənd təsərrüfatı, təhsil, səhiyyə, elm və mədəniyyət mövzularına geniş yer ayırırdı. Qəzet insanların savadlanmasına, milli özünüdərkin güclənməsinə və ictimai fikrin formalaşmasına xidmət edirdi. Cəmi iki il fəaliyyət göstərməsinə baxmayaraq, "Əkinçi" sonrakı dövrdə yaranan bütün milli mətbuat orqanları üçün möhkəm təməl oldu.
Azərbaycan milli mətbuatı sonrakı dövrlərdə müxtəlif inkişaf mərhələlərindən keçmişdir. Tarixin müxtəlif dövrlərində mətbuat bəzən çətinliklərlə qarşılaşsa da, xalqın milli maraqlarının qorunmasına, maarifçiliyin inkişafına və milli-mənəvi dəyərlərin yaşadılmasına xidmət etmişdir. Müstəqillik əldə edildikdən sonra isə ölkəmizdə söz və mətbuat azadlığının təmin olunması istiqamətində mühüm addımlar atılmışdır.Bu sahənin inkişafında Ulu öndər Heydər Əliyevin xidmətləri xüsusi qeyd olunmalıdır. Ulu öndər Heydər Əliyev Azərbaycanda demokratik dəyərlərin inkişafını və mətbuatın azad fəaliyyətini daim diqqət mərkəzində saxlamışdır. Onun rəhbərliyi dövründə kütləvi informasiya vasitələrinin fəaliyyətinin genişləndirilməsi, hüquqi bazanın təkmilləşdirilməsi istiqamətində mühüm qərarlar qəbul edilmişdir. 1998-ci ildə senzuranın ləğv edilməsi Azərbaycan mətbuatının tarixində ən mühüm hadisələrdən biri olmuşdur. Bu addım ölkədə azad sözün və demokratik medianın inkişafına geniş imkanlar yaratmışdır. Ulu öndər Heydər Əliyev jurnalistlərin cəmiyyətdə rolunu yüksək qiymətləndirir, onların fəaliyyətinə hər zaman dəstək göstərirdi.
Bu siyasət bu gün də uğurla davam etdirilir. Cənab Prezident İlham Əliyev milli mətbuatın inkişafını dövlət siyasətinin mühüm istiqamətlərindən biri kimi qiymətləndirir. Cənab Prezident İlham Əliyevin rəhbərliyi ilə informasiya təhlükəsizliyinin möhkəmləndirilməsi, media sahəsində islahatların həyata keçirilməsi, jurnalistlərin sosial rifahının yaxşılaşdırılması və müasir media mühitinin formalaşdırılması istiqamətində mühüm layihələr həyata keçirilmişdir. Media haqqında yeni qanunvericiliyin qəbul edilməsi, Medianın İnkişafı Agentliyinin fəaliyyəti və jurnalistlərin peşəkarlığının artırılmasına yönəlmiş tədbirlər milli mətbuatın inkişafına göstərilən dövlət qayğısının bariz nümunəsidir.Müasir dövrdə rəqəmsal texnologiyaların sürətli inkişafı media sahəsində də böyük dəyişikliklər yaratmışdır. İnternet, sosial şəbəkələr və onlayn xəbər portalları informasiyanın daha operativ yayılmasını təmin edir. Artıq insanlar xəbərləri yalnız qəzet və televiziyadan deyil, mobil telefonlar və digər rəqəmsal platformalar vasitəsilə də əldə edirlər. Bununla yanaşı, saxta xəbərlər və dezinformasiya ilə mübarizə də müasir medianın qarşısında duran əsas vəzifələrdən biridir.Azərbaycan milli mətbuatının gələcək inkişafı rəqəmsal texnologiyaların imkanlarından səmərəli istifadə, peşəkar jurnalistikanın gücləndirilməsi və informasiya təhlükəsizliyinin təmin olunması ilə sıx bağlıdır.
259 №li tam orta ümumtəhsil məktəbi publik hüquqi şəxsi tədris müəssisəsimin
Riyaziyyat müəllimi Günay Məhərrəmova