2026-cı il iyunun 22-də Türkmənistan Prezidenti Sərdar Berdiməhəmmədovun Azərbaycana səfəri çərçivəsində keçirilən görüşlər iki qardaş ölkə arasında münasibətlərin strateji xarakter daşıdığını bir daha nümayiş etdirdi. Prezident İlham Əliyevin mətbuata verdiyi bəyanat əməkdaşlığın müxtəlif istiqamətlər üzrə uğurla inkişaf etdiyini və gələcək perspektivlərin geniş olduğunu göstərdi.
Prezident İlham Əliyev çıxışında Qarabağın bərpası prosesində Türkmənistanın göstərdiyi dəstəyə görə təşəkkürünü ifadə etdi. Xüsusilə Füzuli şəhərində məscidin tikintisi təşəbbüsü qardaş Türkmənistan xalqının Azərbaycanla həmrəyliyinin və dostluğunun bariz nümunəsi kimi qiymətləndirildi. Bu layihə iki ölkə arasında mövcud olan qarşılıqlı etimadın və mənəvi bağlılığın göstəricisidir.
Görüş zamanı tərəflər siyasi, iqtisadi, nəqliyyat-logistika, enerji və humanitar sahələrdə əməkdaşlığın genişləndirilməsi ilə bağlı ətraflı fikir mübadiləsi apardılar. Verilən konkret tapşırıqlar və qarşıya qoyulan məqsədlər yaxın gələcəkdə yeni birgə layihələrin həyata keçirilməsinə zəmin yaradır.
Azərbaycan və Türkmənistan arasında münasibətlərin əsasını ortaq tarix, dil, mədəniyyət və mənəvi dəyərlər təşkil edir. Son illər qarşılıqlı mədəniyyət günlərinin keçirilməsi, yaradıcı kollektivlərin çıxışları və humanitar əlaqələrin inkişafı xalqlar arasında dostluq münasibətlərinin daha da möhkəmlənməsinə xidmət edir. Bakı, Aşqabad, Füzuli və Arkadağ şəhərləri arasında qurulan qardaşlıq əlaqələri də bu əməkdaşlığın mühüm göstəricilərindəndir.
Prezident İlham Əliyev Azərbaycanın Türkmənistanın dəstəyi ilə Mərkəzi Asiya Dövlət Başçılarının Məşvərət Şurasına tamhüquqlu üzv qəbul edilməsini tarixi hadisə kimi dəyərləndirdi. Bu qərar Azərbaycanın Mərkəzi Asiya regionu ilə əlaqələrinin daha da möhkəmlənməsinə, regional əməkdaşlıq və inteqrasiya proseslərində fəal iştirakına yeni imkanlar açır.
Nəqliyyat-logistika sahəsində əməkdaşlıq da görüşün əsas mövzularından biri olub. Müasir dövrdə Şərq-Qərb nəqliyyat dəhlizinin əhəmiyyəti artdıqca Azərbaycan və Türkmənistanın bu istiqamətdə birgə fəaliyyəti regionun iqtisadi inkişafına və beynəlxalq ticarətin genişlənməsinə mühüm töhfə verir.
Nəticə etibarilə, Türkmənistan Prezidentinin Azərbaycana səfəri iki ölkə arasında strateji tərəfdaşlığın daha da dərinləşdiyini nümayiş etdirdi. Qarşılıqlı hörmət, etimad və qardaşlıq prinsiplərinə əsaslanan Azərbaycan–Türkmənistan münasibətləri gələcəkdə də regionda sabitliyin, əməkdaşlığın və tərəqqinin vacib amillərindən biri olacaqdır.

Balaxanı qəsəbəsi, 69 nömrəli tam orta məktəbin
ingilis dili müəllimi Gülnar Qasımova