2021-ci il iyunun 15-də Azərbaycanın mədəniyyət paytaxtı olan Şuşa şəhərində imzalanmış “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi” iki qardaş dövlət arasında münasibətlərin tarixində mühüm hadisə kimi qiymətləndirilir. Bu sənəd təkcə siyasi və hüquqi əhəmiyyət daşımır, həm də xalqlarımızın ortaq tarixi, mədəni və mənəvi dəyərlərinin təsdiqi kimi çıxış edir. Şuşa Bəyannaməsi Azərbaycan ilə Türkiyə arasında strateji tərəfdaşlığı daha yüksək səviyyəyə qaldıraraq müttəfiqlik münasibətlərinin əsasını möhkəmləndirmişdir.
Azərbaycan və Türkiyə arasındakı dostluq və qardaşlıq münasibətləri dərin tarixi köklərə malikdir. Ulu öndər Heydər Əliyevin söylədiyi “Bir millət, iki dövlət” kəlamı bu münasibətlərin mahiyyətini ən dolğun şəkildə ifadə edir. Türkiyə Cümhuriyyətinin banisi Mustafa Kamal Atatürkün “Azərbaycanın sevinci sevincimiz, kədəri kədərimizdir” fikri isə xalqlarımızın bir-birinə olan bağlılığını nümayiş etdirir. Bu ideyalar əsasında formalaşan əlaqələr zaman keçdikcə daha da güclənmiş və strateji müttəfiqlik səviyyəsinə yüksəlmişdir.
Şuşa Bəyannaməsinin imzalanması Azərbaycanın Vətən müharibəsində qazandığı tarixi Zəfərin nəticələrindən biri kimi xüsusi əhəmiyyət daşıyır. Məhz işğaldan azad edilmiş Şuşa şəhərində imzalanan bu sənəd Azərbaycanın ərazi bütövlüyünün və dövlət suverenliyinin bərpasının beynəlxalq əhəmiyyətini bir daha göstərmişdir. Cənab Prezident İlham Əliyev Şuşa Bəyannaməsinin imzalanması mərasimində çıxışı zamanı vurğulamışdır ki, bu sənəd xalqlarımızın iradəsini əks etdirir və gələcək əməkdaşlığın əsas istiqamətlərini müəyyənləşdirir.
Bəyannamə müdafiə və təhlükəsizlik sahəsində əməkdaşlığın daha da genişləndirilməsini nəzərdə tutur. Sənəddə hər iki dövlətin müstəqilliyinə, suverenliyinə və ərazi bütövlüyünə qarşı yönələn təhdidlər zamanı qarşılıqlı dəstək göstərilməsi öz əksini tapmışdır. Bu müddəalar regionda sülhün, sabitliyin və təhlükəsizliyin təmin olunmasına mühüm töhfə verir. Eyni zamanda sənəd regionda revanşist qüvvələrə ciddi mesaj olmaqla yanaşı, Azərbaycan və Türkiyənin sarsılmaz birliyini nümayiş etdirir.
Şuşa Bəyannaməsi iqtisadi sahədə də böyük əhəmiyyət kəsb edir. Sənəddə nəqliyyat, enerji, ticarət, investisiya və logistika sahələrində əməkdaşlığın genişləndirilməsi nəzərdə tutulur. Xüsusilə Zəngəzur dəhlizinin açılması perspektivi regionun iqtisadi imkanlarını artırmaqla yanaşı, beynəlxalq nəqliyyat əlaqələrinin inkişafına da mühüm təsir göstərəcəkdir. Azərbaycan və Türkiyənin birgə həyata keçirdiyi enerji layihələri Avropanın enerji təhlükəsizliyində mühüm rol oynayır və bu əməkdaşlıq gələcəkdə daha da genişlənəcəkdir.
Şuşa Bəyannaməsi eyni zamanda təhsil, elm, mədəniyyət, gənclər siyasəti və informasiya sahələrində əlaqələrin inkişafını da təşviq edir. Bu istiqamətlər üzrə həyata keçirilən layihələr xalqlarımız arasında münasibətlərin daha da möhkəmlənməsinə xidmət edir. Gənc nəslin milli-mənəvi dəyərlər ruhunda yetişdirilməsi və ortaq tarixi irsin qorunması baxımından bu əməkdaşlıq xüsusi əhəmiyyət daşıyır.
Nəticə etibarilə, Şuşa Bəyannaməsi Azərbaycan və Türkiyə arasında münasibətlərin yeni mərhələsini müəyyən edən strateji sənəddir. Bu sənəd iki qardaş dövlətin siyasi, iqtisadi, hərbi və mədəni sahələrdə birliyini daha da möhkəmləndirir, regionda sabitlik və inkişaf üçün etibarlı zəmin yaradır. Şuşa Bəyannaməsi gələcək nəsillərə ötürüləcək mühüm tarixi irs olmaqla Azərbaycan–Türkiyə qardaşlığının əbədi və sarsılmaz olduğunu bir daha təsdiqləyir.
213 nömrəli məktəb-liseyin Azərbaycan dili və ədəbiyyatı müəllimi Abbasova Məsumə