2021-ci il 15 iyun tarixində Azərbaycan Respublikası ilə Türkiyə Respublikası arasında imzalanmış Şuşa Bəyannaməsi iki qardaş dövlətin münasibətlərində yeni mərhələnin başlanğıcı olmuşdur. Azərbaycanın mədəniyyət paytaxtı olan Şuşa şəhərində imzalanan bu sənəd təkcə iki ölkə arasındakı əlaqələrin deyil, bütövlükdə regionun gələcək inkişaf istiqamətlərinin müəyyənləşdirilməsi baxımından mühüm əhəmiyyət daşıyır.

Ulu öndər Heydər Əliyevin müəllifi olduğu “Bir millət, iki dövlət” fəlsəfəsi Azərbaycan-Türkiyə münasibətlərinin əsasını təşkil edir. Bu siyasi kurs bu gün cənab prezident İlham Əliyev tərəfindən uğurla davam etdirilir və daha da inkişaf etdirilir. Şuşa Bəyannaməsi məhz bu möhkəm təməl üzərində qurulmuş strateji əməkdaşlığın hüquqi ifadəsidir.

Bəyannamənin əsas strateji mesajı ondan ibarətdir ki, Azərbaycan və Türkiyə hər zaman bir-birinin yanında olacaq, qarşılıqlı dəstək və həmrəylik nümayiş etdirəcəklər. Sənəddə siyasi, hərbi, iqtisadi, enerji, nəqliyyat, təhsil, mədəniyyət və digər sahələrdə əməkdaşlığın daha da genişləndirilməsi nəzərdə tutulur. Bu isə hər iki dövlətin milli maraqlarının qorunmasına və regional sabitliyin möhkəmləndirilməsinə xidmət edir.

Şuşa Bəyannaməsi Azərbaycan və Türkiyənin iqtisadi qüdrətinin artırılmasına da mühüm töhfə verir. Xüsusilə enerji və nəqliyyat layihələrinin inkişafı, yeni investisiya imkanlarının yaradılması, ticarət əlaqələrinin genişləndirilməsi ölkələrin iqtisadi potensialını daha da gücləndirir.

Bu tarixi sənəd həm də regionda sülh və təhlükəsizliyin təmin olunmasına xidmət edir. Şuşa Bəyannaməsi revanşist qüvvələrə açıq mesajdır ki, Azərbaycan və Türkiyə öz milli maraqlarını qətiyyətlə qorumaq əzmindədirlər.

Cənab prezident İlham Əliyevin qeyd etdiyi kimi, Şuşa Bəyannaməsi tarixi Qars müqaviləsinin ruhuna uyğun olaraq gələcək əməkdaşlığın istiqamətlərini müəyyən edir. Bu sənəd təkcə bu günün deyil, gələcək nəsillərin də inkişafına xidmət edən mühüm siyasi sənəddir.

Nəticə etibarilə, Şuşa Bəyannaməsi Azərbaycan-Türkiyə münasibətlərinin zirvəsini ifadə edən, qardaşlıq və müttəfiqliyin ən yüksək səviyyədə təsdiqi olan tarixi sənəddir.

Eynulla Ağayev adına 198 nömrəli tam orta məktəb

Məktəbdənkənar və sinifdənxaric işlər üzrə təşkilatçı

Abdullayeva Rüfanə