Azərbaycanın inkişaf modelinə nəzər saldıqda aydın görünür ki, ölkəmizin strateji üstünlükləri təsadüfi amillər deyil, düşünülmüş siyasətin və düzgün prioritet seçimin nəticəsidir. Bu üstünlüklər içərisində xüsusi yer tutan əsas amillərdən biri Azərbaycanın coğrafi mövqeyidir. Dövlət başçısının da vurğuladığı kimi, bu üstünlük bizdən asılı olmayan amildir, lakin onu inkişafın hərəkətverici qüvvəsinə çevirmək məhz düzgün idarəetmədən asılıdır.
Azərbaycan Asiya ilə Avropa arasında yerləşən mühüm geostrateji məkanda qərarlaşıb. Şərq-Qərb və Şimal-Cənub nəqliyyat dəhlizlərinin kəsişməsində yerləşməyimiz ölkəmizi beynəlxalq tranzit və logistika mərkəzinə çevirib. Bu mövqe təkcə fiziki yükdaşımalar üçün deyil, həm də informasiya, enerji və rəqəmsal bağlantılar baxımından böyük imkanlar yaradır. Məhz bu səbəbdən ölkəmizdə formalaşdırılmış müasir nəqliyyat və energetika infrastrukturu artıq yeni mərhələdə-rəqəmsal transformasiya mərhələsində strateji baza rolunu oynayır.
Son illər ərzində həyata keçirilən nəhəng enerji layihələri Azərbaycanın regional enerji təhlükəsizliyində aparıcı mövqeyini möhkəmləndirib. Generasiya gücünün iki dəfəyə yaxın artırılması və hazırda 10 min meqavata çatdırılması, eləcə də istifadə edilməyən əlavə enerji potensialının mövcudluğu rəqəmsal iqtisadiyyatın əsas tələblərindən biri olan dayanıqlı enerji təminatını mümkün edir. Data mərkəzlərinin, süni intellekt platformalarının və yüksək texnoloji infrastrukturların yaradılması üçün tələb olunan enerji resursları artıq real imkan kimi mövcuddur.
Bununla yanaşı, fiber-optik xətlərin enerji dəhlizləri boyunca çəkilməsi Azərbaycanın coğrafi mövqeyini yeni məzmunla zənginləşdirir. Xəzərin Şərq sahilləri ilə bağlantıların qurulması və Qərb istiqamətində yeni rəqəmsal kanalların formalaşdırılması ölkəmizi regional rəqəmsal hab kimi mövqeləndirir. Bu isə sadəcə tranzit ölkə olmaq deyil, məlumat və texnologiya axınlarının idarə olunduğu mərkəzə çevrilmək deməkdir.
Azərbaycanın üstünlükləri yalnız coğrafiya ilə məhdudlaşmır. Son 20 ildə iqtisadiyyata 350 milyard dollardan artıq sərmayənin qoyulması, müsbət investisiya iqlimi və xarici investisiyaların hüquqi təminatı ölkəmizə olan etimadı artırıb. Transmilli şirkətlərlə uzunmüddətli və sabit əməkdaşlıq təcrübəsi rəqəmsal sahədə də etibarlı tərəfdaş imici formalaşdırır. Bu baxımdan, strateji tərəfdaşlıq sənədləri və beynəlxalq maliyyə institutları ilə qurulmuş əlaqələr Azərbaycanın qlobal texnoloji transformasiyada fəal iştirakını şərtləndirir.
Rəqəmsallaşma və süni intellektin tətbiqi artıq iqtisadi inkişafın əsas indikatoruna çevrilib. Azərbaycanın coğrafi mövqeyi, enerji potensialı, infrastruktur imkanları və siyasi sabitliyi bu sahədə rəqabət üstünlüyü yaradır. Dövlət xidmətlərinin vahid platformada-“mygov” üzərindən təqdim olunması, dövlət “cloud” sisteminin qurulması və biometrik identifikasiya həllərinin tətbiqi rəqəmsal dövlət modelinin formalaşdığını göstərir.
Azərbaycanın coğrafi vəziyyəti təkcə xəritədəki mövqeyi deyil, strateji üstünlük kimi formalaşdırılmış milli inkişaf konsepsiyasının əsas sütunlarından biridir. Bu üstünlük düzgün planlaşdırma, koordinasiya və beynəlxalq əməkdaşlıq vasitəsilə iqtisadi, texnoloji və siyasi gücə çevrilib. Qarşıdakı mərhələdə əsas məqsəd bu potensialı daha da dərinləşdirərək ölkəmizi regionun aparıcı rəqəmsal və innovasiya mərkəzinə çevirməkdir. Azərbaycanın mövcud üstünlükləri buna tam əsas verir və gələcək inkişafın güclü təməlini təşkil edir.

Rəvanə Kərimova,
Nəsimi Rayon Gənci.