2026-cı il fevralın 4-də Əbu-Dabidə keçirilən “Zayed İnsan Qardaşlığı Mükafatı”nın təqdimolunma mərasimində Azərbaycan Respublikasının Prezidenti İlham Əliyevin çıxışı müasir beynəlxalq münasibətlərdə sülh və dialoqun real nəticələr verdiyini bir daha nümayiş etdirdi. Prezidentin bu nüfuzlu mükafata layiq görülməsi Azərbaycanın humanist dəyərlərə və beynəlxalq əməkdaşlığa verdiyi töhfələrin yüksək qiymətləndirilməsidir.
Prezident İlham Əliyev çıxışında Birləşmiş Ərəb Əmirliklərinin banisi Şeyx Zayedin irsinin bu gün də sülh, tərəqqi və qarşılıqlı anlaşma nümunəsi olduğunu vurğuladı. Qeyd edildi ki, BƏƏ həm tarixi köklərinə sadiq qalmaq, həm də müasir dünyaya açıq olmaq baxımından bir çox ölkələr üçün örnəkdir.
Çıxışın əsas mesajı Azərbaycan və Ermənistan arasında əldə olunmuş tarixi sülhə həsr olundu. Otuz ildən artıq davam edən münaqişədən sonra regionda sülhün bərqərar olması güclü siyasi iradənin və beynəlxalq dəstəyin nəticəsi kimi dəyərləndirildi. Vaşinqton Zirvə Görüşündən sonrakı altı ay əməkdaşlıq, etimad və uzunmüddətli sülhə doğru mühüm addımlarla yadda qaldı.
Prezident İlham Əliyev sülh prosesinə verdiyi töhfəyə görə ABŞ Prezidenti Donald Trampa minnətdarlığını bildirərək, imzalanmış sülh sazişinin regionda yeni əməkdaşlıq imkanları yaratdığını qeyd etdi. Nəqliyyat və ticarət məhdudiyyətlərinin aradan qaldırılması sülhün real və praktik nəticələrini əks etdirir.
“Zayed İnsan Qardaşlığı Mükafatı” Azərbaycan üçün təkcə beynəlxalq nüfuz deyil, həm də dünyaya ünvanlanan aydın mesajdır: uzunmüddətli münaqişələrə baxmayaraq, sülh mümkündür və bu yol dialoqdan keçir.

Balaxanı qəsəbəsi, 69 nömrəli tam orta ümumtəhsil məktəbi,
ibtidai sinif müəllimi Vüsalə Əliyeva