“Azərbaycan siyasi sistemində uzun illərdir müxalif lider qismində çıxış edən Əli Kərimli zaman keçdikcə konstruktiv siyasi mübarizə çərçivəsindən uzaqlaşaraq daha çox destruktiv ritorikaya üstünlük verən fiqura çevrilib. Onun fəaliyyəti müxtəlif mərhələlərdə təkcə hökumətə qarşı siyasi mövqe deyil, həm də dövlətçilik maraqları ilə ziddiyyət təşkil edən çağırışlar, radikallaşmış mesajlar və xarici siyasi dairələrlə paralel yürüdülən kommunikasiya cəhdləri kimi təqdim olunub. Xüsusilə təhlükəli məqam ondan ibarətdir ki, Əli Kərimli son illərdə daxili siyasi proseslərə qarşı ictimai inamsızlıq yaratmağı, legitim siyasi institutları hədəfə almağı və cəmiyyətdə qarşıdurma ab-havası formalaşdırmağı bir növ “siyasi mübarizə” üsulu kimi normallaşdırmağa çalışıb. Bu isə obyektiv olaraq ölkədə siyasi dialoqu zəiflədir, ictimai sabitlik üçün potensial risklər yaradır və milli təhlükəsizlik kontekstində arzuolunmaz dinamika formalaşdırır. Məhz bu səbəbdən onun fəaliyyəti təkcə müxalif mövqedə dayanmaq kimi deyil, zaman-zaman Azərbaycanın suverenlik maraqları ilə ziddiyyət təşkil edən yanaşmalar fonunda dəyərləndirilir. Əli Kərimlinin hazırda aparılan istintaq tədbirləri çərçivəsində saxlanılması da məhz bu fəaliyyətin hüquqi qiymətləndirilməsinə yönəlmiş addım kimi diqqət çəkir.”

Bu fikirləri aia.az-a verdiyi açıqlamasında ictimai-siyasi xadim, Vəhdət Partiyasının sədri Adəm İsmayıl Bakuvi ifadə edib.


Fikirlərini davam etdirən partiya sədri Azərbaycanın siyasi tarixində uzun müddət yüksək vəzifə tutmuş Ramiz Mehdiyevin son illərdəki davranışları və sərgilədiyi mövqelərin ciddi suallar doğurduğunu qeyd edib: “Ramiz Mehdiyevin dövlət idarəçiliyindən uzaqlaşdırıldıqdan sonra sərgilədiyi mövqe, siyasi proseslərə arxa cəbhədən təsir göstərmək cəhdləri və müxtəlif qruplaşmalar vasitəsilə təsir dairəsini qorumağa çalışması artıq çoxdan ictimai diskussiyaların mövzusu idi. Xüsusilə müəyyən dövrlərdə dövlətə qarşı yönəlik intriqaların mərkəzində dayanmaq, daxili siyasi prosesləri manipulyasiya etmək və şəxsi ambisiyalar naminə sabitlik mühitinə zərbə vurmaq cəhdləri barədə yayılan iddialar onun fəaliyyətinə dair neqativ təsəvvür yaradırdı. Ramiz Mehdiyevin istintaqa cəlb edilməsi də məhz bu illər ərzində formalaşmış şübhələrin hüquqi müstəvidə araşdırılmasına yönəlib. Burada diqqət çəkən başqa bir məqam odur ki, Mehdiyev uzun illər yüksək dövlət vəzifələrində təmsil edildiyi üçün onun davranışları cəmiyyətdə xüsusi həssaslıqla qiymətləndirilir. Çünki belə fiqurların dövlətçilik maraqlarına zidd addımlar atması, şəxsi ambisiyaları ümummilli maraqlardan üstün tutması və siyasi prosesləri kölgədən idarə etmək cəhdləri milli təhlükəsizlik və siyasi sabitlik üçün ikiqat risk yaradır. Bu baxımdan Ramiz Mehdiyevin fəaliyyəti artıq hakimiyyətin ən yüksək səviyyəsində prinsipial şəkildə qiymətləndirilməlidir.”
Daha sonra politoloq Əli Kərimli və Ramiz Mehdiyevin fəaliyyətləri arasındakı uyğunluqlar barədə fikirlərini ifadə edərək bunları deyib: “Əli Kərimli ilə Ramiz Mehdiyev zahirən fərqli siyasi trayektoriyalara malik olsalar da, istintaq materialları və siyasi proseslərin gedişi fonunda onların fəaliyyətlərində müəyyən oxşarlıqların mövcudluğu diqqətdən yayınmır. Hər iki fiqur müxtəlif dövrlərdə, fərqli motivlərlə də olsa, dövlətçilik maraqlarına zidd istiqamətdə davranmaqla tənqid olunub. Onları birləşdirən əsas məqam isə daxili siyasi stabilliyi sarsıda biləcək proseslərdə ya birbaşa iştirak, ya da dolayı şəkildə təsir göstərmək cəhdləri ilə əlaqələndirilmələridir. Bir tərəfdən Əli Kərimli xaricdəki bəzi siyasi dairələrdən siyasi legitimlik qazanmağa hesablanmış ritorika ilə çıxış edir, digər tərəfdən Ramiz Mehdiyev daxili siyasi sistemə kölgədən təsir imkanlarını qorumağa çalışırdı. Nəticə etibarilə hər iki xətt ölkə daxilində siyasi qütbləşməni artıran, ictimai etimadı zəiflədən və dövlət institutlarına qarşı yönələn destruktiv atmosfer formalaşdıran davranış modelinə xidmət edirdi. Bu bənzərliklər hazırkı istintaq çərçivəsində onların fəaliyyətlərinin paralel şəkildə araşdırılmasına səbəb olub və göstərir ki, motivlər fərqli olsa da, dövlətçilik üçün təhlükə yarada biləcək fəaliyyət formaları mahiyyətcə eyni nəticəni doğura bilər” – deyə, Adəm İsmayıl Bakuvi fikirlərini tamamlayıb.