Azərbaycan ilə Özbəkistan arasında dostluq və qardaşlıq münasibətləri tarixən möhkəm təmələ əsaslanmış və illər ərzində daha da inkişaf etmişdir. Bu gün iki ölkə təkcə siyasi sahədə deyil, iqtisadiyyat, mədəniyyət, humanitar əməkdaşlıq, nəqliyyat və enerji kimi geniş istiqamətlərdə strateji tərəfdaşlıq əlaqələrini uğurla davam etdirir. Prezident İlham Əliyevin sözləri ilə desək, “Ölkələrimizi təkcə coğrafiya deyil, həm də tarixi-mədəni əlaqələr, ortaq dini və mənəvi dəyərlər birləşdirir.”
2023-cü ildə təsis edilmiş Ali Dövlətlərarası Şura bu münasibətlərin daha da dərinləşməsində mühüm rol oynayır və iki dövlət arasında gələcək inkişaf strategiyasının müəyyənləşdirilməsinə xidmət edir. Prezident İlham Əliyevin vurğuladığı kimi, “Azərbaycan ilə Özbəkistan arasında münasibətlər ən yüksək – müttəfiqlik səviyyəsindədir.”
İkitərəfli danışıqlarda əsas istiqamətlərdən biri iqtisadi-ticari əməkdaşlığın gücləndirilməsi və regional tranzit imkanlarının genişləndirilməsidir. Müasir dövrdə nəqliyyat-logistika infrastrukturu ölkələrin qlobal iqtisadiyyata inteqrasiyasında həlledici əhəmiyyət daşıyır. Bu istiqamətdə atılan addımlar hər iki dövlət üçün yeni imkanların açılmasına səbəb olur. Müsahibəsində Prezident İlham Əliyev bu məqamı belə ifadə edir: “Əməkdaşlığımızın əsas istiqamətlərindən biri şaxələndirilmiş nəqliyyat və logistika infrastrukturunun inkişafıdır.”
Eyni zamanda energetika sahəsində, xüsusilə də alternativ və yaşıl enerji istiqamətində əməkdaşlıq iki qardaş ölkənin regional liderlik mövqeyini daha da gücləndirir. Humanitar sahədə münasibətlərin inkişafı isə xalqlar arasında bağları daha da möhkəmləndirir, mədəni dəyərlərin qarşılıqlı tanıdılmasına töhfə verir.
Azərbaycan və Özbəkistan arasında qarşılıqlı etimad, dostluq və strateji tərəfdaşlıq müasir dövrün çağırışlarına uyğun olaraq genişlənməkdə davam edir. Bu əməkdaşlıq həm regional sabitliyə, həm də hər iki ölkənin sosial-iqtisadi inkişafına mühüm dəstək verir. Prezident İlham Əliyevin sözləri ilə desək, “Özbəkistan Azərbaycan üçün qardaş ölkə və etibarlı müttəfiqdir.”
Mövcud münasibətlər göstərir ki, Azərbaycan–Özbəkistan əməkdaşlığı gələcək illərdə daha da güclənəcək, hər iki xalqın rifahı üçün yeni imkanlar yaradacaq.

Ramana qəsəbəsi, 198 nömrəli tam orta məktəbin
direktor səlahiyyətlərini müvəqqəti yerinə yetirən Rufanə Abdullayeva