Azərbaycan xalqının tarixində elə günlər var ki, bu günlər bir millətin iradəsini, birliyin gücünü, qəhrəmanlığın zirvəsini əks etdirir. Bu günlərdən biri də 8 Noyabr – Zəfər Günüdür. Bu tarix Azərbaycan dövlətçiliyinin, xalqın azadlıq və ədalət uğrunda apardığı mübarizənin rəmzinə çevrilmişdir. 8 Noyabr 2020-ci ildə Azərbaycan Ordusunun 44 günlük Vətən müharibəsində əldə etdiyi böyük qələbənin simvolu kimi tarixə düşdü. Bu gün Qarabağın incisi olan Şuşa şəhərinin azad olunması ilə yadda qaldı və Prezident İlham Əliyevin Sərəncamı ilə “Zəfər Günü” elan olundu. Ermənistanın 30 ilə yaxın işğalçılıq siyasəti nəticəsində Azərbaycanın torpaqları – Qarabağ və ətraf rayonlar işğal altında qalmışdı. 1990-cı illərin əvvəllərində baş verən hadisələr nəticəsində bir milyondan çox azərbaycanlı qaçqın və məcburi köçkünə çevrildi. Ermənistan sülh danışıqlarını uzadır, beynəlxalq təşkilatların qətnamələrinə məhəl qoymurdu.2020-ci ilin sentyabrında Ermənistan silahlı qüvvələrinin növbəti təxribatı nəticəsində Azərbaycan Ordusu əks-hücum əməliyyatına başladı. Bu əməliyyat tarixə 44 günlük Vətən müharibəsi kimi düşdü. Müharibənin məqsədi təkcə torpaqların azad olunması deyil, həm də xalqın milli ləyaqətinin, ədalətin bərpası idi. Azərbaycan Ordusu Müzəffər Ali Baş Komandan İlham Əliyevin rəhbərliyi ilə qısa müddətdə böyük uğurlar qazandı. Düşmənin “məğlubedilməz ordu” mifi cəmi bir neçə gün ərzində darmadağın edildi. Füzuli, Cəbrayıl, Zəngilan, Qubadlı kimi rayonlar mərhələlərlə azad olundu.Müharibənin həlledici mərhələsi isə Şuşa döyüşləri oldu. 8 noyabr 2020-ci ildə Azərbaycan əsgəri sıldırım qayaları aşaraq, şəhəri düşməndən azad etdi. Şuşanın azad olunması təkcə hərbi deyil, həm də mənəvi qələbə idi. Bu, xalqın ruhunun dirçəlişi, torpaqların sahibinə qayıdışı demək idi.Bu qələbə təkcə hərbi sahədə deyil, həm də milli birliyimizin təntənəsi idi. Vətən müharibəsi zamanı cəmiyyətin bütün təbəqələri – gənclər, qadınlar, yaşlılar – bir məqsəd uğrunda birləşdi. Hər kəsin ürəyi cəbhədə döyünürdü. Zəfər Günü Azərbaycanın beynəlxalq nüfuzunu da xeyli artırdı. Qələbə sayəsində regionda yeni reallıqlar yarandı, ədalət bərpa olundu.Bu gün azad edilmiş torpaqlarda böyük bərpa və quruculuq işləri aparılır. Şuşa, Füzuli, Ağdam, Cəbrayıl və digər bölgələrdə yeni yollar, hava limanları, məktəblər, xəstəxanalar tikilir. “Böyük Qayıdış” proqramı ilə məcburi köçkünlər doğma yurdlarına dönürlər. Bu, Zəfərin davamı, müstəqilliyin möhkəmlənməsi deməkdir.
Qələbə asan başa gəlmədi. Minlərlə igid oğul, yüzlərlə qəhrəman zabit və əsgər bu torpaq uğrunda canından keçdi. Onların fədakarlığı, vətən sevgisi əbədidir. Bu gün hər bir azərbaycanlı şəhidlərimizin ruhu qarşısında baş əyir. Onların qəhrəmanlığı gənc nəsil üçün örnəkdir. Məktəblərdə, universitetlərdə, hərbi hissələrdə Zəfər Günü ərəfəsində şəhidlər yadolunur, xatirə tədbirləri keçirilir. 8 Noyabr Zəfər Günü gələcək nəsillərə Vətən sevgisi, milli ruh və qürur aşılayan bir tarixdir. Bu gün bizə öyrədir ki, birlik və inam olduğu halda heç bir güc Azərbaycan xalqını sındıra bilməz. Zəfər Günü həm də milli kimliyimizin, müstəqil dövlətimizin qorunmasının rəmzidir. Hər il bu gün ölkənin bütün bölgələrində, məktəblərdə, hərbi hissələrdə, meydanlarda bayraq yürüşləri, konsertlər və tədbirlər keçirilir.8 Noyabr – Zəfər Günü Azərbaycan tarixində şanlı qəhrəmanlıq salnaməsidir. Bu gün bir daha göstərdi ki, Azərbaycan xalqı öz torpaqlarını azad etməyə, dövlətini qorumağa qadirdir. Zəfər Günü milli birliyimizin, dövlətimizin qüdrətinin, xalqımızın yenilməzliyinin təntənəsidir. Biz bu qələbəni əbədi yadda saxlamalı, şəhidlərimizin xatirəsini yaşatmalı və Qarabağın inkişafı üçün var gücümüzlə çalışmalıyıq. Çünki bu Zəfər Azərbaycan xalqının birliyi, Ali Baş Komandanın iradəsi və ordumuzun şücaəti sayəsində qazanılıb.

Maştağa qəsəbəsi, 293 nömrəli tam orta məktəbin
tarix müəllimi Aytən Musayeva