27 Sentyabr – Anım Günü 27 Sentyabr Azərbaycanın taleyində silinməz iz qoyan, millətimizin qəhrəmanlıq dastanına çevrilən bir gündür. Bu tarix qəhrəman şəhidlərimizin xatirəsinə ehtiram günüdür. 2020-ci ilin həmin səhəri Ermənistanın yeni təxribatına cavab olaraq başlanan Vətən müharibəsi Azərbaycanın haqq səsini dünyaya duyurdu, torpaq həsrəti ilə alışan illərin ümidini gerçəyə çevirdi.
Bu gün rəşadətli Azərbaycan əsgər və zabitlərinin, eləcə də mülki vətəndaşlarımızın canı, qanı bahasına torpaqlarımızın işğaldan azad edilməsinin başlanğıcı oldu. 2020-ci ilin dekabrında cənab Prezident İlham Əliyevin sərəncamı ilə 27 Sentyabr Anım Günü elan edildi. Bu qərar müharibədə şəhid olan hər bir vətəndaşın əziz xatirəsini əbədiləşdirmək, onların göstərdiyi misilsiz qəhrəmanlığı gələcək nəsillərə ötürmək məqsədi daşıyır. Bu günün hər anı şəhidlərimizin qanı ilə yoğrulmuş torpaqlarımızın azadlığına aparan yolun başlanğıcıdır. Onların fədakarlığı ilə xalqımız həm kədəri, həm də qüruru eyni anda yaşadı: kədər – itirdiyimiz igidlərə, qürur – qazandığımız zəfərə görə. 2020-ci ilin 27 sentyabrında başlanan və 44 gün davam edən II Qarabağ müharibəsində cənab Prezident İlham Əliyevin rolu həm siyasi, həm diplomatik, həm də strateji baxımdan həlledici idi.
Vətən müharibəsində Azərbaycan Ordusunun qəhrəmanlığı həlledici rol oynasa da, siyasi və hərbi-strateji rəhbərlik cənab Prezident İlham Əliyevin üzərinə düşürdü. Onun illərlə apardığı ordu islahatları, qətiyyətli diplomatiyası və müharibə dövründəki rəhbərliyi 44 günlük zəfərin əsas dayaqlarından biri kimi tarixə yazıldı. 27 Sentyabr təkcə hüzn günü deyil, həm də Azərbaycan xalqının milli birliyinin, vətənpərvərliyinin və ordumuzun gücünün simvoludur. O günlərdə Azərbaycan xalqı bir yumruq kimi birləşdi. Ali baş komandan, Prezident İlham Əliyevin çıxışları və liderlik tərzi cəmiyyətin bütün təbəqələrini birləşdirən mühüm amil oldu. Onun “Qarabağ Azərbaycandır!” şüarı müharibə boyu milli həmrəyliyin simvoluna çevrildi. Cəbhədə əsgər, arxada ana, ata, uşaq – hər kəs Vətən naminə eyni ürəklə döyündü. 27 Sentyabr sadəcə xatirə günü deyil, həm də xalqımızın sarsılmaz birliyinin, azadlıq eşqinin simvoludur. Hər il ölkənin bütün bölgələrində, həmçinin xaricdə yaşayan soydaşlarımız tərəfindən bu gün müxtəlif anım mərasimləri, yürüşlər və memorial tədbirlər keçirilir. Prezidentin sərəncamı ilə bu tarix Anım Günü kimi rəsmiləşdi ki, hər yeni nəsil şəhidlərin qanı ilə yazılmış tarixi unutmasın. Hər il saat 12:00-da Azərbaycan susur – şəhidlərin ruhuna sayğı ilə bir dəqiqəlik sükut edilir. Bu sükut minlərlə sözün ifadə edə bilmədiyi dərin bir ehtiramdır. Hər bir azərbaycanlı bu tarixi ürəyində daşımalı, şəhidlərin müqəddəs ruhu qarşısında daim borclu olduğunu unutmamalıdır.

Sabunçu qəsəbəsi, 155 nömrəli tam orta məktəbin
riyaziyyat müəllimi Rübabə Nağıyeva