Azərbaycan ilə Özbəkistan arasında dostluq və qardaşlıq əlaqələri tarixən dərin köklərə malik olmuşdur. Bu münasibətlər təkcə mədəniyyət və ortaq dəyərlərlə deyil, həmçinin siyasi və iqtisadi əməkdaşlıqla möhkəmlənməkdədir. 2023-cü ildə Daşkənddə imzalanan Müttəfiqlik münasibətləri haqqında Müqavilə bu əlaqələrin ən yüksək zirvəyə çatdığını təsdiqləyən mühüm tarixi hadisə oldu. Sənəd Azərbaycan və Özbəkistan arasında dövlətlərarası münasibətlərin ali formasını müəyyənləşdirərək iki ölkəni rəsmi müttəfiq statusuna yüksəltdi.
İyulun 2-də Bakıda keçirilən Azərbaycan-Özbəkistan Ali Dövlətlərarası Şuranın ikinci iclası da məhz bu strateji əməkdaşlığın davamı olaraq mühüm qərarlarla yadda qaldı. Azərbaycan Prezidenti İlham Əliyev və Özbəkistan Prezidenti Şavkat Mirziyoyevin iştirakı ilə keçirilən iclasda ötən dövr ərzində əldə olunan uğurlar qiymətləndirildi və yeni hədəflər müəyyən edildi. İlham Əliyev çıxışında iki ölkənin ortaq tarixə, mədəniyyətə, dilə və etnik yaxınlığa sahib olduğunu vurğuladı: “Biz Özbəkistan-Azərbaycan qardaşlığının gözəl binalarını inşa edirik”, deyə o bildirdi.
Özbəkistan Prezidenti Şavkat Mirziyoyev də öz çıxışında Azərbaycanın göstərdiyi yüksək səviyyəli qəbul üçün təşəkkürünü bildirdi və əlaqələrin son illərdə tamamilə fərqli mərhələyə keçdiyini qeyd etdi: “Biz artıq müttəfiqik. Bu, bütün mətləblərdən xəbər verir”, dedi.
Şura iclasında iqtisadiyyat, nəqliyyat, energetika və mədəniyyət sahələrində birgə layihələrin icrası ilə bağlı müvafiq nazirlər məruzə etdilər. Həmçinin, yeni perspektiv əməkdaşlıq sahələri üzrə dövlət başçıları tərəfindən konkret tapşırıqlar verildi.
Azərbaycan və Özbəkistan arasında imzalanan Müttəfiqlik Müqaviləsi, təkcə hüquqi sənəd deyil, həm də iki dövlətin ortaq gələcək naminə iradəsinin və qardaşlıq ruhunun rəmzidir. Bu gün hər iki ölkə regional və qlobal miqyasda strateji tərəfdaş olaraq bir-birini dəstəkləməkdədir.
Fikrimcə, Azərbaycan və Özbəkistan arasındakı müttəfiqlik münasibətləri regionda sabitlik və rifah üçün nümunəvi modeldir. Daşkənddə imzalanan Müqavilə və Bakıdakı Ali Şura iclası bu dostluğun daha da güclənəcəyinin əyani göstəricisidir. İki qardaş ölkənin birlikdə atdığı addımlar həm xalqlarımızın rifahına, həm də regionun strateji təhlükəsizliyinə xidmət edir.

Rəvanə Kərimova,,
Nəsimi Rayon Gənci.